رووداو - هەولێر
ئەنجوومەنی باڵای دادوەری عێراق فەرمانی دەستگیركردنی سەرۆكی ئەنجوومەنی پارێزگای كەركووكی راگرت.
رێبوار تاڵەبانی، سەرۆكی ئەنجوومەنی پارێزگای كەركووك بە (تۆڕی میدیایی رووداو)ـی راگەیاند "ماوەی 10 رۆژە ئەو بڕیارە دەركراوە دوای ئەوەی خۆم لە بەغدا چوومە بەردەم دادگا ئەو فەرمانە نەما كە ناویان نابوو فەرمانی دەستگیركردن".
تاڵەبانی ئەوەشی گوت "دوای ئەوەی لەسەر داوای من ئەو كەیسە گواسترایەوە بەغدا لەیەكەم دانیشتن ئامادەبووم حوكمی غیابی و فەرمانی دەستگیركردن نەما، هەموو حوكمەكان داخران، چونكە من لە كوردستان و لە عێراقم و بەئاشكراش كارەكانی خۆم جێبەجێدەكەم تاوەكو ئێستاش فەرمانەكانی كەركووك لەلای من بەڕێوەدەبردرێن".
ئاماژەی بەوەشکرد "ئێستا دەتوانم بڕۆمە هەر شوێنێك لە عێراق و فەرمانی دەستگیركردنم لەسەر نەماوە".
هاوکات لەو بەڵگەنامەیەی ئەنجووومەنی باڵای دادوەری عێراق دەریكردووە هاتووە "بەپێی بڕیاری دادگای تاوانی رەسافە، تایبەت بە پرسەكانی ئەستۆپاكی، شوشتنەوەی پارە و تاوانی ئابووری لە بەرواری 26-5-2019 لەبارەی پرسی سزادانی تایبەت بە تۆمەتبار رێبوار فائیق عەبدولمەجید تاڵەبانی، وەکو ئاماژەكردن بە نووسراوی دادگای تاوانەكانی كەركووك، بڕیاردرا، بڕیاری دەستگیركردن لەسەر تۆمەتبار رابگیرێت".
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ