ئامادەکاری دەکرێت بۆ سەردانی مەسرور بارزانی، سەرۆکوەزیرانی هەرێمی کوردستان بۆ هەڵەبجە
رووداو دیجیتاڵ
دوای چوار ساڵ لە چاوەڕوانی، هەڵەبجەييەکان دڵخۆشن بە دەستپێکردنی پڕۆژەی پردی توەقووت کە بە "يەکێک لە باشترين پڕۆژەی ستراتيجیی پارێزگاکە"ی دەزانن.
ئەنوەر حوسێن، هاونيشتمانییەکی خەڵکی هەڵەبجەیە و دەڵێت، "ئێمە سوپاسی حکومەت دەکەين ئەگەر ئەم پردە بەس بەردی بناخە نەبێت، بەزووترين کات ئەگەر ببەسترێت بۆ پارێزگای هەڵەبجە پردی پەيوەندييە بۆ کەلار، سلێمانی و شوێنەکانی دیکە، پردی پەيوەندييە بۆ گەشتياران و هەلی کارە بۆ کۆمەڵێک گەنجی ئەم شارە، داواکارين ئەم پڕۆژە بەجێنەهێڵن."
بەگوتەی جێگری پارێزگاری هەڵەبجە، تەواوبوونی پڕۆژەکە دەبێتە هۆی دابينکردنی هەلی کار و گرنگیی زۆری ئابووری و گەشتياری دەبێت بۆ پارێزگاکە.
شاهين حەمە رەزا، جێگری پارێزگاری هەڵەبجە گوتی، "ديارە وەک ئاگادارن سبەی جەنابی کاک مەسرور بارزانی و کاک قوباد تاڵەبانی و وەزيرە بەڕێزەکان دێن بۆ کردنەوەی پردی توەقووت، وەک دەزانن پردی توەقووت گرنگييەکی زۆری هەيە و ئاواتی هەموو خەڵکی هەڵەبجە و دەڤەرەکەيە، دەرگايەکی دیکە بۆ هەڵەبجە دەکرێتەوە لەڕووی بازرگانی و گەشتيارييەوە، گرنگی زۆری هەيە و دەستی کار دەکاتەوە لە ناوچەکە."
پڕۆژەی پردی توەقووت، تەنیا بریتی نییە لە پردەکە، بەڵکو پرد و رێگاکەیەتی، تەنیا رێگاکەی 27 کیلۆ مەترە، هەروەها درێژیی پردەکە 250 مەترە، پڕۆژەکە بە 720 رۆژ تەواو دەکرێت.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ