هەڵەیەک روویدا! دووبارە هەوڵبدە
فرسەت سۆفی پارێزگاری کۆچکردووی هەولێر. گرافیک: ئەحمەد بەهرام - رووداو
رووداو دیجیتاڵ
کۆتا هەناسەی دایەوە و نەیتوانی شارەکەی ببینێتەوە. فرسەت سۆفی، پارێزگارە گەنجەکەی هەولێر، لە خانەوادەیەکی هەژاری جووتیارەوە بۆ باڵاترین پۆستی پارێزگاکەی. بەیانیی رۆژی چوارشەممە، دوای نزیکەی مانگێک لە تووشبوونی بە کۆرۆنا، کۆچی دواییکرد.
فرسەت سۆفی پێشتر لە دیمانەیەکدا بە رووداوی گوت، هەولێر سرووشتێکی سەیری هەیە، "کە لێی ژیای، زەحمەتە بتوانی دەستبەرداری ببیت. باوەڕ بکە، ئینسان کە دەچێتە دەرەوەش، سەفەر دەکات، هەناسەبڕکێیەتی تاوەکو دەگەڕێتەوە".
فرسەت سۆفی لە گوندی گەزنەی دەڤەری باڵەکایەتی لەدایکبووە، خۆی دەڵێت، لە خێزانێکی جووتیار و هەژار لەدایکبووە و خوێندنی سەرەتایی تاوەکو ئامادەیی لە سۆران و دیانا تەواو کردووە. قۆناخەکانی خوێندنی باڵاش، بەکالۆریۆس، ماستەر و دکتۆرای لە زانکۆی سەلاحەدین تەواوکردووە.
فرسەت سۆفی، بڕوانامەی دکتۆرای لە یاسادا هەبوو، بەشێکی ژیانی بۆ خوێندنەوە تەرخانکردبوو، لەگەڵ ئەوەی تێکەڵاوی کاری سیاسیی و کارگێڕیش بوو، بەڵام وازی لە خوێندنەوە نەهێنا و بۆ سوود وەرگرتن لە ئەزموونیان، چیرۆکی سەرکەوتنی سیاسیی و گەلانی دونیای دەخوێندەوە.
فرسەت سۆفی وەکو هەر تاکێکی دیکەی کورد، بەردەوام خەونی بە سەربەخۆیی کوردستانەوە دەبینی، هەر لە منداڵییەوە زۆربەی شیعرە نیشتمانییەکانی شاعیرە گەورەکانی کوردستانی ئەزبەرکردبوو.
پارێزگاری کۆچکردووی هەولێر، خەڵکی گوندێکی سنووری قەزای چۆمانە، لە ساڵی 1998 بۆ خوێندنی زانکۆ دەچێتە هەولێر، لەوێ بە یەکجاری نیشتەجێ دەبێت و ژیانی هاوژینی پێکدەهێنێت.
فرسەت سۆفی، خەونی زۆری هەبوون، بیرۆکە و پرۆژەی زۆریشی بۆ بەرەوپێشبردن و جوانکردنی شارەکەی هەبوون، بەڵام کۆرۆنا رێگربوو لە بەدیهێنانیان.
دوای بڵاوبوونەوەی هەواڵی کۆچی دوایی، بەشێکی زۆری هاونیشتمانیان و سەرکردە سیاسییەکان لە هەرێمی کوردستان ماتەمیان گێڕا، پێش هەمووان فەرمانبەر و کارمەندانی دیوانی پارێزگای هەولێر. ئەوان بە گوتەی خۆیان "زیاتر" هەست بە کۆستی کۆچی دوایی پارێزگارەکەیان دەکەن.
شوان محەممەد پۆلیسە و پاسەوانی باڵەخانەی پارێزگای هەولێر، رۆژانە لە دەرگەی پارێزگاوە پێشوازی لە دکتۆر فرسەت دەکرد، ئەو قسەکانی پارێزگاری کۆچکردووی هەولێری کردووەتە بەرنامەی کاری رۆژانەی.
شوان بە رووداوی گوت، هەمیشە پێی دەگوتین رێز لە هاووڵاتی بگرن، "ئەو وەک براگەورەبوو بۆ ئێمە.. بەداخەوە ئەو براگەورەیەمان لەدەستدا".
فرسەت سۆفی ساڵێک و دوومانگ پارێزگاری هەولێر بوو، زۆربەی ژیانی بۆ کارەکەی تەرخانکردبوو، بەجۆرێک زۆربەی رۆژانی هەفتە رۆژ و شەو لە ئەرکدابووە.
بیار فایەق، بەرپرسی راگەیاندنی پارێزگای هەولێرە، دەڵێت، "رۆژانە کاک دکتۆر پێداگیری لەوە دەکردەوە کە ئاگامان لە خەڵک بێت، بۆئەوەی بە دڵشکاوی لە پارێزگای هەولێر نەچنەدەرەوە".
فرسەت سۆفی پێش ئەوەی ببێت بە پارێزگاری هەولێر لە چەندین شوێنی دیکە پلە و پۆستی هەبووە و کاری کردووە. ئەو دکتۆرای لە یاسای گشتی هەبوو، ئەندامی خولی چوارەمی پەرلەمانی کوردستان بوو، ئەندامی دەستەی راوێژکاریی یاسایی سەرۆکایەتیی هەرێمی کوردستان بوو، ئەندامی لیژنەی نووسینەوەی دەستووری هەرێمی کوردستان و ئەندامی لیژنەی باڵای چاکسازی بوو.
هەروەها مامۆستای زانکۆی پۆلەتەکنیکی هەولێر بوو، لەوێش مامۆستایان و خوێندکاران ماتەمیان بۆ گێڕا.
لە 12-9-2019 دکتۆر فرسەت سۆفی لە ئەنجوومەنی پارێزگای هەولێر وەک پارێزگار متمانەی پێدراو و هەڵبژێردرا. دوای کۆچی دوایی هەر لەو شوێنەوە 3 رۆژ ماتەمینی بۆ کۆچی دوایی راگەیێندرا و بڕیاردرا لە سنووری پارێزگای هەولێر ئاڵای کوردستان لەسەر دامو دەزگا فەرمییەکان بۆ نیوە بهێندرێنە خوارەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ