ژن و پیاوێکی هەڵەبجەیی نۆ منداڵیان قوربانیی کیمیابارانن: چاوەڕێ بوون ئێوارە بگەڕێینەوە

 

 

لەتیف رەشید، سەرۆککۆمارى عێراق گوتی، "هیوادارم هەڵەبجە ببێتە نموونەى قوربانى و خەبات، نەک تەنیا بۆ کوردستان، بەڵکو بۆ هەموو جیهان."

 

لەنێو ئاپۆڕاى ئەو خەڵکەدا دوو هاوژینى بەتەمەن، کە لە 16-03-1988 لە 14 منداڵیان 9یان گیانیان لەدەستدا، ناخهەژێنترین دیمەنیان خستە دڵى ئامادەبووانەوە.

 

حەیات حەمەعەلى، دایکى 9 قوربانیى کیمیابارانی هەڵەبجە دەڵێت، "ئێمە ئەو رۆژە لە عیادە بووین لە هەڵەبجە، هەواڵیان پێداین و گوتیان دراوە لە هەڵەبجە و کەس دەرنەچووە، ئیدی هەر لە سلێمانى ماینەوە، تاوەکو ساڵى 1991."

 

ئەحمەد عەبدوڵڵا، باوکى 9 قوربانیی کیمیابارانی هەڵەبجە ئاماژەی بەوە کرد، "ئەو رۆژە و دواتریش زۆر گەڕام بۆیان، ئیدی کەسیانم نەدۆزییەوە، ئەو 9 منداڵەمان ورد بوون، چاوەڕێ بوون ئێوارە بگەڕێینەوە، بەڵام ئاواى لێهات."

 

10 ساڵە هەڵەبجە لەلایەن هەرێمى کوردستانەوە کراوە بە پارێزگا، بەڵام هێشتا دانیشتووانەکەى ناڕازین لە ئاستى خزمەتگوزارییەکانیان.

 

کامەران حەمەساڵح، بەڕێوەبەرى گشتیى کاروبارى شەهیدانى هەڵەبجە دەڵێت، "لە رۆژى 15 و 17ى ئادار ئاساییە هەرچى گلەیى و گازندەیە بیکەین، بەڵام ئەمڕۆ دەبێت تایبەت بێت بە یادکردنەوە و ماتەمینى."

 

ئازاد مستەفا، بەڕێوەبەرى گشتیى تەندروستیى هەڵەبجە باس لەوە دەکات، "64 بەرکەوتەى کیمیاییمان هەن کە خەریکە چاو لەدەست دەدەن، بەڵام خۆشبەختانە رەزامەندییان بۆ هاتووەتەوە و دواى ماوەیەکى دیکە دەیاننێرینە دەرەوە بۆ وەرگرتنی چارەسەر."