چوار خۆپێشاندەری خەڵکی سنە مەترسیی سزای سێدارەیان لەسەرە

 

بەپێی راپۆرتی تۆڕی مافی مرۆڤی کوردستان، کەیوان زەندی، ئارام ئازاد، سەردار شاهمورادی و هوشەنگ چوارگورگە کە بە "دژایەتیکردنی خودا" تۆمەتبار کراون، ئێستا لە زیندانی ناوەندیی شاری سنەدان و مەترسیی ئەوەیان لەسەرە سزای سێدارەیان بەسەردا جێبەجێ بکرێت.

 

ئەو چوار هاونیشتمانییە مانگی کانوونی یەکەمی 2022 لە ناڕەزایەتییەکانی شاری سنە، لەلایەن هێزە ئەمنییەکانەوە دەستبەسەر کران و بەپێی ئەو راپۆرتە، بۆ ماوەی چەندین مانگ لە گرتووخانەی دامەزراوە ئەمنییەکانی شاری سنەدا ئەشکەنجە دراون بۆ ئەوەی دانپێدانانی ناچارییان لێ وەربگیرێت.

 

تۆڕی مافی مرۆڤی کوردستان دەڵێت، ئەو چوار کەسە لە شوێنی جیاواز دەستبەسەر کراون، بەڵام تۆمەتبار کراون دەستیان لە کوشتنی پۆلیسێکدا هەبووە، کە رۆژی 17.11.2022 لە رێوڕەسمی چلەی کوژراوانی ناڕەزایەتییەکاندا، کوژراوە.

 

ئەو چوار هاونیشتمانییە رەتیانکردووەتەوە دەستیان لە کوشتنی ئەو پۆلیسەدا هەبووبێت. ئەوان لەلایەن رێکخراوی ئیتلاعاتی سوپای پاسدارانەوە دەستگیر کراون.

 

کۆماری ئیسلامیی ئێران تاوەکو ئێستا 7 کەس لە بەشدارانی ناڕەزایەتییەکانی پاری لەسێدارە داوە. رێکخراوی مافی مرۆڤی ئێران پێشتر بڵاوی کردبووەوە، لانیکەم 109 خۆپێشاندەر مەترسیی لەسێدارەدانیان لەسەرە.