هێزی پێشمەرگە لە باکووری چیای قەرەچووخ ئۆپەراسیۆنێکی ئەنجامدا

 

سیروان بارزانی، سەرپەرشتیاری میحوەری مەخموور- گوێڕی هێزی پێشمەرگەی کوردستان ئەمڕۆ پێنجشەممە 8-9-2022 بە تۆڕی میدیایی رووداوی راگەیاند، رۆژی 7-9-2022 هێزی پێشمەرگەی کوردستان لە میحوەری شەش ئۆپەراسیۆنێکیان لە بەشی باکووری چیای قەرەچووخ دەستپێکرد. 

 

سیروان بارزانی گوتی، ئۆپەراسیۆنەکە دوو رۆژی خایاند و تێیدا 36 ئەشکەوتی چەکدارانی داعش دۆزرانەوە و پشکنران و، دەستبەسەر بڕێکی زۆر چەک و تەقەمەنی و کەرەستەی دروستکردنی بۆمبیشدا گیراوە. 

 

سەرپەرشتیاری میحوەری مەخموور- گوێڕی هێزی پێشمەرگە گوتیشی، هێزەکانی پێشمەرگە سەرکەوتووانە ئۆپەراسیۆنەکەیان ئەنجامدا و هیچ زیانێکیش بە پێشمەرگە نەگەیشتووە.

 

داعش لە حوزەیرانی 2014دا موسڵ و بەشێکی زۆری دیکەی ناوچە سوننەنشینەکانی عێراقی خستەژێر دەسەڵاتی خۆی؛ لە ئابی 2014دا لەسەر دەستی هێزی پێشمەرگەی کوردستان و بە هاوکاریی هاوپەیمانیی نێودەوڵەتی، رووبەڕووی یەکەمین شکست بووەوە. 

 

2017 کۆتایی خەلافەتی داعش لە عێراق راگەیێندرا، بەڵام یەکێک لەو شوێنانەی پاشماوەکانی داعش وەک پەناگە بەکاریانهێناوە، سنووری مەخموور و چیای قەرەچووخە.