رووداو دیجیتاڵ
بەهۆی تەقینەوەی مینەوە لە چیای قەلەڕەش لە سنووری قەزای سیدەکان لە ئیدارەی سەربەخۆی سۆران، دوو برا بەر مین کەوتن و یەکێکیان گیانی لەدەستدا.
بەرەبەیانی ئەمڕۆ یەکشەممە، دوو برا لە سنووری سیدەکان مینێکیان پێدا تەقیەوە و بەهۆیەوە یەکێکیان گیانی لەدەستدا و ئەوەی دیکەش بریندار بوو.
رابەر ئەنوەر، بەرپرسی راگەیاندنی دەزگای گشتیی کاروباری مینی هەولێر بە رووداوی راگەیاند، رووداوەکە لە چیای قەلەڕەش روویداوە و مینێکی سەردەمی شەڕی 8 ساڵەی عێڕاق - ئیرانیان پێدا تەقیوەتەوە.
بەگوێرەی زانیارییەکانی رووداو، ئەو دوو گەنجەی ئەمرۆ بەر مین کەوتوون، دانیشتووی گوندی بێخمەن لە سنوری خەلیفان.
ئەوەی گیانی لەدەستداوە ناوی محەمەد هەینییە و تەمەنی 28 ساڵە، بریندارەکەش ناوی سەفوان هەینییە و 27 ساڵە.
بەگوێرەی ئاماری بەرگریی شارستانیی سۆران بۆ رووداو، تەنیا ئەم ساڵ پێنج کەس بەهۆی تەقینەوەی مینەوە بوونەتە قوربانی، سێ کەس گیانیان لەدەستداوە و دووی دیکەش بریندار بوون.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ