رووداو دیجیتاڵ
یەکێک لە بریندارانی رووداوی تەقینەوەی تانکەرەکەی سووتەمەنی لە ناوچەی پیشەسازیی کەلار گیانی لەدەستدا. خاڵۆزایەکی دەڵێت، "بڕیار بووە نەشتەگەری بۆ بکرێت، بەڵام کاژێر 2:00ی بەیانی ئەمڕۆ ئاگادارکراینەوە کە بەهۆی سەختی برینەکەیەوە گیانی لەدەستداوە."
رۆژی 24-04-2023 لەکاتی لەحیمکردنی تانکیی گازی تانکەرێکی سووتەمەنی، تانکەرەکە لە ناوچەی پیشەسازیی کەلار ئاگری گرت و بەهۆیەوە کەسێک گیانی لەدەستدا و سێ کەسی دیکەش بریندار بوون. یەکێک لە برینداربووەکان بە ناوی ئەحمەد عەلی بەهۆی سەختی برینەکەیەوە رەوانەی نەخۆشخانەکانی سلێمانی کرا.
ئاریان عومەر، خاڵۆزای ئەحمەد عەلی ئەمڕۆ چوارشەممە بە تۆڕی میدیایی رووداوی گوت: "بڕیار بوو لە دوو رۆژی رابردوودا نەشتەگەری بۆ ئەحمەد بکرێت، بەڵام بەهۆی بەکتریا لە پشتیدا نەمانتوانی نەشتەگەری بۆ بکەین و کاژێر 2:00 بەیانی ئەمرۆ ئاگادارکراینەوە کە بەهۆی سەختی برینەکەی گیانی لەدەستداوە."
ئاریان عومەر دەڵێت: "ئەحمەد توانیویەتی قسە بکات و شتیشی خواردووە، بەڵام زۆر بێ هێز بووە."
بەهۆی رووداوی تەقینەوەی تانکەرە سووتەمەنییەکە، ئاریان ئیبراهیمی لەدایکبووی ساڵی 1994 کە لەحیمچی بوو، دەستبەجێ لە شوێنی رووداوەکە گیانی لەدەستدا و سێ کەسی دیکە برینداربوون ئەوانیش عەلی تالب، شۆفێری ئۆتۆمبێلەکە، شاهۆ فەتاح و ئەحمەد عەلی بوون .
ئیبراهیم محەممەد، گوتەبێژی بەرگریی شارستانیی گەرمیان رۆژی 24-04-2023 بە رووداوی گوت: "هۆکاری تەقینەوەکە ئەوە بووە پاکی نەکردووەتەوە. پێویست بوو ئەو تانکەرە بە ئاو و بە زاهی و تاییت چەند جارێک بشۆردرێت و پاک بکرێتەوە؛ دڵنیایی بدرێت کە مادەی گاز و غازی تێدا نییە و دواتر کاری تێدا بکرێت."
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ