رووداو دیجیتاڵ
لە دوو رووداوی هاتووچۆدا لە پارێزگای ورمێی رۆژهەڵاتی کوردستان، چوار کەس گیانیان لەدەستدا و چوار کەسی دیکەش بریندار بوون. یەکێک لەوانەی گیانی لەدەستدا، بەڕێوەبەری کەشناسیی پارێزگاکەیە.
رۆژی چوارشەممە (2ـی نیسانی 2025) فەرزین رەزازادە، بەڕێوەبەری فریاکەوتنی پارێزگای ورمێ رایگەیاند، "بەرەبەیانیی ئەمڕۆ لە نزیک گوندی چورس کە سەر بە شاری چایپارەیە، ئۆتۆمبێلێکی تایبەت لە جۆری هیوندا خۆی بە ستوونێکی کارەبادا کێشا و وەرگەڕا."
رەزازادە گوتی، "لە رووداوەکەدا، سێ کەس لە سەرنشینانی ئۆتۆمبێلەکە گیانیان لەدەستدا و دوو کەسی دیکە بە سەختی بریندار بوون."
لە رووداوێکی دیکەدا، رۆژی سێشەممە، 1ـی نیسانی 2025، بەڕێوەبەری کەشناسیی پارێزگای ورمێ گیانی لە دەستدا.
بەڕێوەبەری فریاکەوتنی پارێزگای ورمێ دەڵێت، "بەهۆی وەرگەڕانی ئۆتۆمبێلەکەی لە رێگەی نەغەدە – ورمێ، ئیسماعیل سیمایی، بەڕێوەبەری کەشناسیی پارێزگای ورمێ گیانی لەدەستدا و هاوژین و منداڵەکەشی بریندار بوون."
پۆلیسی رێگەوبانی ورمێ رایگەیاند، هۆکاری رووداوەکە سەرنج نەدانی شوفێر و تیژڕۆیی بووە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ