هەڵەیەک روویدا! دووبارە هەوڵبدە
کۆنگرە رۆژنامەڤانییە هاوبەشەکە
رووداو دیجیتاڵ
پارێزگاری دهۆک دەڵێت، رێگە نادەن هیچ کەسێک ببێتە هۆکاری دروستبوونی جیاوازی لەنێوان شارەکانی دهۆک و زاخۆدا. سەرپەرشتیاری ئیدارەی سەربەخۆی زاخۆش دەڵێت، ئەوەی چەند رۆژێک لەمەوبەر لە یارییەکدا روویدا جێگەی نیگەرانییە و تۆمەتباران رووبەڕووی یاسا دەکرێنەوە.
ئەمڕۆ سێشەممە 01-04-2025 د. عەلی تەتەر، پارێزگاری دهۆک و گوهدار شێخۆ، سەرپەرشتیاری ئیدارەی سەربەخۆی زاخۆ، لەگەڵ سەرۆکی یانەکانی دهۆک و زاخۆ لە کۆنفرانسێکی رۆژنانەڤانیی هاوبەشدا باسیان لە رووداوەکانی دوای یاریی نێوان دهۆک و زاخۆ کرد.
د. عەلی تەتەر رایگەیاند، "جیاوازی لەنێوان دهۆک و زاخۆ نییە، خەریکە دەبینە یەک شار؛ سەرکەوتنی زاخۆ سەرکەوتنی دهۆکە و بە پێچەوانەوە." گوتیشی، "هیچ کاتێک وەرزشی دهۆک و زاخۆ هێندە پێشنەکەوتووە؛ هیوادارین بتوانین جامی کەنداو و عێراق ببەین."
پارێزگاری دهۆک گوتیشی، "چەند کەسێک بێ رێزییان کردووە کە نوێنەرایەتیی هیچ یانەیەک و تەنانەت خێزانەکانی خۆشیان ناکەن. زۆرینەی خەڵک لەگەڵ ئەو رەفتارە نین کە کرا."
عەلی تەتەر رایگەیاند، چەند "کەسێکی تێکدەر" دەستگیرکراون و هەر کەسێک بەردەوامی بەو جۆرە کارانە بدات "رێکاری تووند بەرامبەری دەگیرێتەبەر. دهۆک و زاخۆ ناکەینە قوربانیی کەسانی تێکدەر؛ رێگەش نادەین جیاوازی بخەنە نێوان دوو شاری دراوسێ و برا."
هاوکات گوهدار شێخۆ، سەرپەرشتیاری ئیدارەی سەربەخۆی زاخۆ باسی لەوە کرد، ئەوانەی ئەو جۆرە کارانە دەکەن "رۆحی وەرزشییان نییە" و گوتی، "ئەوەی روویدا جێگەی داخە و لیژنە پێکهێندراوە بۆ ئەوەی تۆمەتباران رووبەڕووی یاسا بکرێنەوە."
گوهدار شێخۆ داوای لە هاندەرانی هەردوو یانەکە کرد، بە شێوەیەکی دروست هانی یانەکانیان بدەن.
دوای یاریی دهۆک و زاخۆ کە لەنێو یاریگەی دهۆک بەڕێوەچوو و دهۆک بە گۆڵێکی بێ بەرامبەر براوە بوو، چەند کەسێک هەندێک قسە و جووڵەیان کرد کە وەک بێ رێزی بە یانەی بەرامبەر لێکدرایەوە.
عەبدوڵڵا جەلال، سەرۆکی یانەی دهۆک رایگەیاند، لە بەرامبەر قسە و جووڵەکانی راهێنەری یانەکەیان کە بووە هۆی نیگەرانیی یانەی زاخۆ و هاندەرانیان "داوای لێبووردن دەکەین و سەرۆکی یانەش ڤیدیۆیەک دەکات و روونی دەکاتەوە کە مەبەستی بێ رێزێکردن نەبووە".
سەرۆکی یانەی زاخۆش سوپاسی حکومەت و لایەنە پەیوەندیدارەکانی کرد کە هاتوونەتە سەر هێڵ و لیژنەیان پێکهێناوە و گوتی، "هاندەران رێز لە ماندووبوونی یاریزانان و تیمەکان بگرن و دەست لەسەر برینەکان دابنێن، ئێمە برای یەکدین و جیاوازیمان نییە".
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ