رووداو دیجیتاڵ
نێچیرڤان بارزانی، سەرۆکی هەرێمی کوردستان بە بۆنەی سه‌ری ساڵی نوێی 6775ی بابلی ـ ئاشووری و جه‌ژنه‌کانی ئه‌کیتۆوه پیرۆزبایی لە هاووڵاتییانی کلدان و ئاشووری و سریان لە کوردستان و عێراق و سەرانسەری جیهان دەکات و دەڵێت: با ئەم ساڵ جەژنی ئەکیتۆ دەرفەت بێت بۆ خۆشەویستیی نێوان پێکهاتەکانی گەلی کوردستان.
سەرۆکی هەرێمی کوردستان لە راگەیێندراوێکدا، ئەمڕۆ سێشەممە، پیرۆزبایی لەو پێکهاتانەی کوردستان کردووە.
لە راگەیێندراوەکەدا هاتووە: لەم بۆنەیەدا، جارێکی دیکە له هه‌رێمى كوردستان جەخت لە پابەنديی هەمیشەییمان به پاراستنی ماف و ئازادییەکان و بره‌ودان به كولتوورى فره‌ڕه‌نگى و پێکەوەژیانی ئاشتییانە و لێبورده‌يى و يه‌كترقبووڵكردن لەنێو هەموو پێکهاتە ئایینی و نەتەوەییەکانى كوردستاندا دەکەینەوە.
دەقی راگەیێندراوەکەی نێچیرڤان بارزانی، سەرۆکی هەرێمی کوردستان:
بە بۆنەی سه‌ری ساڵی نوێی 6775ی بابلی ـ ئاشووری و جه‌ژنه‌کانی ئه‌کیتۆوه، گه‌رمترين پيرۆزبايى پێشکەش بە هاووڵاتییانی خۆشه‌ويستى کلدان و ئاشووری و سریان لە کوردستان و عێراق و سەرانسەری جیهان دەکەم، هیوادارم جەژن و پشوویه‌کی خۆش و ئارام به‌سه‌ر به‌رن.
جەژنی ئه‌کیتۆ بۆنەیەکی مێژوویی و دێرينى شارستانیی به‌هاداره، قووڵایيی رەگی کولتووری و مرۆیيی یەکێک لە دێرینترین پێکهاتەکانی ناوچەکەمان نيشان ده‌دات کە له به‌ره‌به‌يانى مێژووه‌وه بەشدارییان لە دروستکردنی شارستانیيەته‌كانی ناوچەکە و پاراستنی فرەڕه‌نگييه‌کەیدا، کردووە.
لەم بۆنەیەدا، جارێکی دیکە له هه‌رێمى كوردستان جەخت لە پابەنديی هەمیشەییمان به پاراستنی ماف و ئازادییەکان و بره‌ودان به كولتوورى فره‌ڕه‌نگى و پێکەوەژیانی ئاشتییانە و لێبورده‌يى و يه‌كترقبووڵكردن لەنێو هەموو پێکهاتە ئایینی و نەتەوەییەکانى كوردستاندا دەکەینەوە.
با ئەم ساڵ جەژنی ئەکیتۆ دەرفەتێکی نوێ بێت بۆ پته‌وكردن و بەهێزکردنی خۆشەویستی و ژیانی هاوبەش و رێزله‌يه‌كگرتن لەنێو هەموو پێکهاتەکانی گەلی کوردستاندا، هه‌روه‌ها سەرچاوەی هیوایەک بێت بۆ داهاتوویەکی باشترى پڕ لە گەشەسەندن و ئارامى و ئاسووده‌يى بۆ هەمووان.
جەژنی ئه‌کیتۆ له هه‌موو لايه‌ك پيرۆز بێت، هەموو ساڵێك به خۆشى.
نێچیرڤان بارزانی
سەرۆکی هەرێمی کوردستان
1ی نیسانی 2025
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ