کوردستان
کۆبووەنەوەی نێچيرڤان بارزانى، سه‌رۆكى هه‌رێمى كوردستان و ئێلبروس كوتراشێڤ، باڵيۆزى رووسيا له عێراق
رووداو دیجیتاڵ
سه‌رۆكى هه‌رێمى كوردستان لەگەڵ باڵيۆزى رووسيا له عێراق کۆبوونەوە و تاوتوێی په‌يوه‌ندييه‌كانى نێوان هه‌ولێر و به‌غدا و چارەسەرکردنی کێشەکانیان کرد.
رۆژی چوارشه‌ممه، 01-03-2023، له هه‌ولێر نێچيرڤان بارزانى، سه‌رۆكى هه‌رێمى كوردستان له ديدارێكدا له‌گه‌ڵ ئێلبروس كوتراشێڤ، باڵيۆزى رووسيا له عێراق و شاندێكى ياوه‌رى کۆبووەوە.
لە کۆبوونەوەکەدا، بەگوێرەی راگەیێندراوی سەرۆکایەتیی هەرێمی کوردستان، دۆخى سياسى و ئابووريى عێراق، په‌يوه‌ندييه‌كانى هه‌ولێر - به‌غدا و گفتوگۆى چاره‌سه‌ركردنى كيشه‌كانى نێوانيانیان تاوتوێ كرد.
نێچيرڤان بارزانى و ئێلبروس كوتراشێڤ لەبارەی په‌يوه‌ندييه‌كانى رووسيا له‌گه‌ڵ عێراق و هه‌رێمى كوردستان و دوايين سه‌ردانى وه‌زيرى ده‌ره‌وه‌ى رووسيا بۆ به‌غدا بيروڕايان گۆڕييه‌وه.
رۆژی 5ـی شوباتى 2023، سێرگى لاڤرۆڤ، وەزیرى دەرەوەى رووسیا سەردانی بەغدای کرد و لەگەڵ وەزیرى دەرەوە، سەرۆککۆمار و سەرۆکوەزیرانى عێراق کۆبووەوە و لەبارەی ئەگەری فراوانکردنی وەبەرهێنانی رووسیا لە سێکتەری نەوت و گازی هەرێمی کوردستان بە رووداوی گوت، هەر رێککەوتنێک بکرێت، دەبێت بە رەزامەندیی حکومەتی فیدراڵیی عێراق بێت.
وەک سەرۆکایەتیی هەرێمی کوردستان دەڵێت، پێشهاته‌كانى شه‌ڕ له ئۆكراينا و لێكه‌وته‌كانى و دۆخى ناوچه‌كه به‌گشتى، ته‌وه‌رێكى ديكه‌ى ديداره‌كه بوو.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ