د. فوئاد حوسێن: بەدڵنیاییەوە لەم رۆژانەدا 400 ملیار دینارەکە دەگاتە هەرێمی کوردستان

 

لە هەڤپەیڤینێکدا لەگەڵ تۆڕی میدیایی رووداو کە ئاڵا شاڵی، پەیامنێری رووداو لە ئەڵمانیا لەگەڵی ئەنجامی دا، د. فوئاد حوسێن، وەزیری دەرەوەی عێراق باسی لە ئەنجامی سەردانی شاندی عێراقی بە سەرۆکایەتیی محەممەد شیاع سوودانی، سەرۆکوەزیران بۆ ئەڵمانیا کرد و لەبارەی پرسی کۆچبەرانەوە رەتیکردەوە کە عێراق رەزامەندی بە دیپۆرتکردنەوەی عێراقییەکان لە ئەڵمانیا دابێت. ئاماژەی بەوەش کرد، لەگەڵ سەرۆککۆماری عێراق سەردانی داڤۆس دەکەن.

 

نزیکەی 36 هەزار عێراقی لە ئەڵمانیا دەژین کە تاوەکو ئێستا مافی مانەوەیان پێ نەدراوە، لەوبارەوە وەزیری دەرەوەی عێراق رایگەیاند، راوێژکاری ئەڵمانیا داوای کارئاسانی کردووە بۆ گەڕانەوەیان بۆ عێراق.

 

سەبارەت بە پرسی ناردنی 400 ملیار دینارەکە بۆ هەرێمی کوردستان، فوئاد حوسێن گوتی، کێشە لای وەزیری دارایی هەبووە بۆ ناردنەکەی و چارەسەرکراوە و پارەکە لە بانکی تی بی ئایە. دەشڵێت، لەم رۆژانەدا 400 ملیارەکە دەگاتە هەرێمی کوردستان.

 

 

 

فوئاد حوسێن: زۆرینەی پرسەکان پەیوەندیداربوون بە بابەتی ئابووری، سووتەمەنی و پەنابەرانی عێراقی لە ئەڵمانیا.

 

 

فوئاد حوسێن: لەگەڵ سیمێنس چەند گرێبەستێک هەیە و دەگەڕێتەوە بۆ سێ بۆ چوار ساڵ پێش ئێستا، بەڵام قۆناخەکان دیارن؛ هەر کارێکی نوێ گرێبەستێکی دەوێت، ئەمە بۆ قۆناخێکی نوێیە، بۆ داهاتووە؛ بە تێڕوانینی من ئەگەر ئەم گرێبەستە جێبەجێ بکرێت مانای وایە سیمێنس رۆڵێکی باڵا دەگێڕێت لە کارکردن لەسەر کارەبا. سیمێنس کۆمەڵێک کەرەستەی هێناوە کە پەیوەندیی بە نەخۆشخانەکانی عێراقەوە هەیە و لەوێش کاردەکەن، گرێبەستەکە پەیوەندی بە کارەباوە هەیە.

 

 

فوئاد حوسێن: ئەڵمانیا دەڵێت دۆخی ئەمنی باشە، باس لەوەش دەکات کە یاسا و کارەکانی وەبەرهێنان چۆنن و ئەو بیۆکراتییەی کە هەیە، هەروەها ئاماژەیان بە بابەتی گەندەڵی کرد، بە گشتی لەگەڵ کۆمەڵێک کۆمپانیای ئەڵمانی گفتوگۆ کرا، سەرۆکوەزیریش باسی لەوەکرد کە ئێستا عێراق ئامادەیە پێشوازیی لە کۆمپانیا ئەڵمانییەکان بکات بۆ وەبەرهێنان لە عێراق.

 

 

فوئاد حوسێن: لەگەڵ سەرۆکی ئەڵمانیا و سەرۆکوەزیران کۆمەڵێک تەوەر باسکران، جگە لە باسی ئابووری، دۆخی سیاسیی ناوچەکە، هەروەها سەرۆککۆماری ئەڵمانیا باسی پەیوەندیی نێوان هەولێر و بە‌غدا کرد و پرسیاری چۆنییەتی پەیوەندییەکانی دەکرد، پڕسیاری پڕۆژەیاسای نەوتیشی کرد.

 

 

فوئاد حوسێن: 400 ملیارەکە لە کاتی خۆیدا ئەنجوومەنی وەزیرانی بڕیاری ناردنی دا، بەڵام دواکەوت و کۆمەڵێک کێشەی تێکەوت لای وەزیری دارایی، بەڵام چارەسەر بوو، پێش ئەوەی ئێمە بێینە ئەڵمانیا لە کۆبوونەوەی ئەنجوومەنی وەزیران چارەسەر بوو.

 

 

فوئاد حوسێن: ئەوە نازانم؛ لای بانکی تی بی ئایە، لەم رۆژانە بەدڵنیاییەوە دەگات، چونکە بڕیارەکە هەیە و رەزامەندیشی لەسەر دراوە، جەنابی سەرۆکوەزیرانی هەرێمی کوردستانیش لەم رۆژانە لە بەغدا بوو، لەنێوان هەردوولا رێککەوتن کراوە.

 

 

فوئاد حوسێن: راوێژکاری ئەڵمانیا لە کۆبوونەوەی لەگەڵ سەرۆکوەزیران و شاندی عێراق باسی لەو عێراقییانە کرد کە مافی نیشتەجێبوونیان نییە و بەشێوەیەکی نایاسایی لە ئەڵمانیا دەژین، باسی لەوەکرد کە 35 تاوەکو 36 هەزار عێراقی لە ئەڵمانیا هەن و مافی نیشتەجێبوونیان نییە، داوای لە عێراق کرد کە رێگەیەک بکاتەوە و هاوکارییان بکات بۆ گەڕانەوەیان، چونکە لێرە مافی نیشتەجێبوونیان نییە و پێیان نادرێت. سەرۆکوەزیرانی عێراق گوتی: ئێمە پلانێکمان هەیە؛ منیش خۆم لەگەڵ وەزارەتی ناوخۆ لە بەرلین کۆبوونەوەم هەبوو باسی پلانێکی دوو قۆڵیمان لەنێوان ئەڵمانیا و عیراق کرد، بەڵام بەشێكی پلانەکە پەیوەندیی هەبێت بە یەکێتیی ئەوروپاوە، چونکە ئەم کێشەیە کێشەی ئەڵمانیا نییە و کێشەی وڵاتانی ئەوروپایە، بەشێکی لە پەیوەندی دوو قۆڵی چارەسەر دەبن و بەشێکیشێ بە پەیوەندیی ئەوروپا و عێراق، کێشەیەکی قوڵە و قورسە و ئاسان نییە بڵێین چارەسەر دەبێت. دوور نییە کە ئەو پلانەی لەلایەن ئێمە، ئەڵمانیا و ئەوروپاوە بێتە پێشەوە بتوانێت رێگەیەک بکاتەوە بۆ دانانی چەند پلانێک بۆ چارەسەربوون.

 

 

فوئاد حوسێن: نانا باسی ئەوە نەکرا، باسی پلانێک کرا کە چۆن لەگەڵ کێشەکەدا مامەڵەبکەین، کە باسی دەکەین دەبێت پلان هەبێت، کە پلان هەبوو دەچینە نێو وردەکارییەوە.

 

 

فوئاد حوسێن: کە باسی وەبەرهێنان دەکرێت بۆ هەرێمی کوردستانیشە، زۆرینەی ئەو کۆمپانیایانە لە هەرێمی کوردستان هەن، هەندێکیان دەمێکیشە لەوێن، بەگشتی بۆ هەموو عێراقە.

 

 

فوئاد حوسێن: سەرۆکی ئەڵمانیا خۆی باسی کرد، یەکەم پرسیاری کرد کە پەیوەندییەکانی بەغدا و هەولێر چۆنن؛ دووەم پرسیاری کرد بابەتی نەوت، سێیەمیش گوتی ئاگادارم کێشە لەنێوان کوردەکان خۆیان؛ لەنێو هێزە سیاسییەکانی نێو هەرێمی کوردستان، ئەگەر کوردستان سەقامگیر نەبێ کێشەیە.

 

 

فوئاد حوسێن: من دەچمە داڤۆس و سەرۆکوەزیرانی دەگەڕێتەوە بەغدا؛ لەوێ کۆمەڵێك کۆبوونەوەم هەیە لەگەڵ سەرکردەکان و وەزیرانی دەرەوەی زۆر لە دەوڵەتەکان، جەنابی سەرۆککۆماریش دێت بۆ داڤۆس و لەوێ بەرنامەیەکمان هەیە کە 16ـی مانگ داڤۆس دەستپێدەکات.