ئەندامێکی لیژنەی نەخۆشیی تای خوێنبەربوون: گۆشتی قوربانی راستەوخۆ بەکارنەیەت

 

رۆژی یەکشەممە 18-6-2023 د. میقداد ئیبراهیم ئاکرەیی لە بووڵتەنی نوورۆژدا پشتڕاستی کردەوە کە نەخۆشیی تای خوێنبەربوون ڤایرۆسییە و لە ئاژەڵی تووشبووەوە دەگوازرێتەوە بۆ مرۆڤ. 

 

د. میقداد دەڵێت: ''نەخۆشییەکە لە ساڵی 1979 وە تۆمارکراوە تەنانەت لە وڵاتانی دیکەی رۆژهەڵاتی نێوەڕاست و ئەوروپاشدا هەیە''.

 

لە بارەی ئەو کەسانەی کە مەترسیی تووشبوونیان بە نەخۆشییەکە زیاترە ئەندامەکەی لیژنەی تای خوێنبەربوون دەڵێت: ''گۆشتفرۆش، کرێکارانی کوشتارگەکان، پزیشکانی ڤێتێرنەری و ئەوانەی کە گۆشت دەخۆن یاخود ئامادەی دەکەن مەترسیی تووشبوونیان زیاترە''. 

 

لەبارەی خۆپارێزییەوە گوتیشی، پێویستە ئاژەڵدارەکان ساڵانە ئاژەڵەکانیان بشۆن یاخود دەرزییان لێبدەن، هەروەها شوێنی بەخێوکردنیان پاکبکەنەوە و بە دەرمانی مێرووکوژ بڕشێندرێن. 

 

د. میقداد رێنوێنیی هاونیشتمانییان دەکات کە گۆشتی قوربانی پێویستە 24 کاژێر لەنێو بەفرگردا دابنرێت، چونکە لەو ژینگەیەدا ئەگەری لەناوچوونی ڤایرۆسەکە زۆرە، هەروەها بە پێویستی زانی کە گۆشت بە باشی بکوڵێندرێت.