رووداو – تەندروستی
توێژینەوەیەک لە ئەمریکا رایدەگەیێنێت، هەوکردنی رێڕەوی میزەڕۆ لە خانماندا کاریگەریی نەرێنی لەسەر شێوازی ژیان و کارکردنی رۆژانەیان دروستدەکات.
توێژەرانی کۆمپانیای سێرنێر ئینڤیزا بۆ خزمەتگوزاریی تەندروستی و توێژینەوەی زانستی دەریدەخەن، هەوکردنی میزەڕۆ دەبێتەهۆی ناڕێکیی خەو، کەمیی چالاکیی جەستەیی و کەمبوونەوەی ئارەزووی سێکسی لە خانماندا، سەرئەنجام کاریگەریی نەرێنی لەسەر شێوازی ژیانی خانمان دروستدەکات.
توێژینەوەکە لە گۆڤاری پڵەس وەنی ئەمریکی بڵاوکراوەتەوە و 375 خانم تێیدا بەشداربوون، دەرکەوت هەوکردنی میزەڕۆ شێوازی ژیانی تووشبووانی ناڕێک کردووە، بەجۆرێک 'خەو، ئارەزووی سێکسی، چالاکیی جەستەیی و پەیوەندییە کۆمەڵایەتییەکان'ـیان کەمبووەتەوە.
هەروەها توێژینەوەکە ئاشکرای دەکات، هەوکردنی میزەڕۆ زۆرترین کاریگەریی لەسەر کەمکردنەوەی ئارەزووی سێکسی بەڕێژەی 67٪ دەبێت، هەروەها 60.8٪ کوالێتی و کاتی خەویش تێکدەدات و 52٪ چالاکییەکانی رۆژانەی تووشبووان کەمدەکاتەوە.
بە گوتەی سەرپەرشتیاری توێژینەوەکە، هۆکاری سەرەکیی بۆ ناڕێکبوونی شێوازی ژیانی تووشبووان بریتین لە کاریگەریی لاوەکیی ئەو دەرمان و چارەسەرییانەی بۆ نەخۆشییەکە بەکاردێن یاخود ئەو نیشانانەی کە کەسی تووشبوو دووچاریان دەبێتەوە.
دکتۆر جێفری تۆمسۆن، پسپۆڕی نەخۆشییەکانی خانمان و یەکێک لە نووسەرەکانی توێژینەوەکە چەند رێنوێنییەک بۆ کەمکردنەوەی مەترسیی تووشبوون بە هەوکردنی میزەڕۆ ئاشکرادەکات و دەڵێت: ''خواردنی خۆراکە دژەئۆکسێنەرەکان، بەکارهێنانی پڕۆبایۆتیکەکان کە بەکتریای سوودبەخشیان تێدایە، تەواوکەرەخۆراکییەکانی ڤیتامین سی، خواردنەوەی ئاوی پێویست و پاکوخاوێنیی کۆئەندامی زاوزێ' ئەگەری تووشبوون بە هەوکردنی میزەڕۆ لە خانماندا کەمدەکاتەوە.
خزمەتگوزاریی تەندروستیی نیشتمانیی NHS لە بەریتانیا رایدەگەیێنێت، بەکتریا هۆکاری سەرەکیی تووشبوونە بە هەوکردنی میزەڕۆ، هەروەها نیشانەکانی وەکو 'ئازار و سووتانەوە لەکاتی میزکردن، ئازاری بەشی خوارەوەی سک و هەبوونی خوێن لە میز' لەکاتی بوونی هەوکردنی میزەڕۆ دەشێت هەستیان پێبکرێن.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ