د. گۆران محێدین هەورامی، پسپۆڕی نەخۆشییەکانی هەناو. وێنە: رووداو
رووداو - تەندروستی
سەرۆکی بەشی هەناو لە نەخۆشخانەی شار لە سلێمانی رایدەگەیێنێت، رۆژانە ژمارەیەکی زۆر تووشبووی سکچوون و رشانەوە سەردانی نەخۆشانەکە دەکەن، بەڵام بەشێکی کەمیان پێویستیان بە مانەوە هەیە.
رۆژی یەکشەممە 3-9-2023 د. گۆران محێدین هەورامی، پسپۆڕی نەخۆشییەکانی هەناو و سەرۆکی بەشی هەناو لە نەخۆشخانەی شار لە سلێمانی رایگەیاند، تەنیا بە دەستنیشانکردنی تووشبوویێکی کۆلێرا واتە کۆلێرا لە ناوچەکەدا بڵاوبووەتەوە و پێویستە سەرجەم رێوشوێنەکانی بنبڕکردنی نەخۆشییەکە بگیرێنەبەر.
د. گۆران هەرامی دەڵێت: تووشبووەکانی کۆلێرا لە گەڕەکە جیاوازەکانی سلێمانی تۆمارکراون، تەنانەت تووشبووی دەرەوەی شاریشیان تێدایە.
ئەو بەرپرسەی بەشی هەناو لە نەخۆشخانەی شار گوتی، 'خانمانی دووگیان، بەساڵاچووان، منداڵ و تووشبووی نەخۆشییە درێژخایەنەکان' پێویستە لەکاتی دەرکەوتنی نیشانەکان سەردانی نەخۆشخانە بکەن، چونکە گرووپی مەترسیدارن بە پاشهاتەکانی سکچوون و رشانەوە.
د. گۆران هەورامی ئاماژە بەوەدەکات کە زۆرینەی ئاوی خواردنەوە بە خاوێنی دەگاتە ماڵەکان، بەڵام کێشە لە چۆنیەتی هەڵگرتن و کۆگاکردنی ئاو هەیە، هاوکات بە پێویستی دەزانێت کە ساڵانە تانکی ئاو پاکبکرێتەوە یاخود بایەخ بە کوڵاندنی ئاو بدرێت بەتایبەت بۆ ئەو ئاوانەی کە سەرچاوەکانیان نادیارە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ