یادی جگەرخوێنی شاعیر لە ئامەد کرایەوە

 

رۆژی سێشەممە، 22-10-2024، سەرۆکایەتیی فەرمانگەی کاری کۆمەڵایەتی و کولتوور سەر بە گەورەشارەوانیی ئامەد، لە 40ەمین ساڵیادی کۆچی دوایی جگەرخوێن، شاعیری کورد چالاکییەکی سازکرد. بەشێک لە سەرۆکشارەوانیی شارۆچکەکانی پارێزگاکە و ژمارەیەک لە نووسەران بەشدار بوون.

 

دلاوەر زەراق، نووسەر و وەرگێڕی کوردی خەڵکی ئامەد لە قسەکەرەکانی چالاکییەکە بوو و گوتی، جگەرخوێن خاوەنی زۆر بەرهەمی وەک شانۆ، چیرۆک و شیعرە و گوتی، ''شیعرەکانی بۆ زۆر هونەرمەندی گەورە سرووشبەخش بوون''. 

 

زەراق ئاماژەی بەوە کرد، جگەرخوێن بەگوێرەی ریتمێک کە تایبەتە بە کۆمەڵگەی کوردی شیعری نووسی و رایگەیاند، ''ئەو شاعیرە سوودی لە ئەدەبیاتی زارەکی و کلاسیکی وەرگرت؛ سوودی لە شیعرەکان وەرگرت و سەرلەنوێ دایڕشتەوە''. 

 

جگەرخوێن ناوی شێخمووس حەسەن محەممەدە و ساڵی 1903 لە گوندی حەساری مێردینی باکووری کوردستان لەدایکبوو، هەوراز و نشێوییەکی زۆری لە ژیانی خۆیدا بینی و دەڵێت، "بەهۆی کەمیی سەرچاوەکانی فێربوونی شیعرەوە ئازاری زۆرم چەشت تاوەکو توانیم ببمە شاعیر، بەڵام بەردەوام بووم لە هەوڵەکانم تاوەکو ئەو کاتەی شیعرم نووسی و کتێبم بڵاوکردەوە؛ بۆیە نەوەی داهاتووی دوای من، بەدەست نەبوونی سەرچاوەوە ناناڵێنن".

 

جگەرخوێن خاوەن هەشت دیوانی شیعرە و هەندێک کتێبی چیرۆک، کولتووری و مێژوویی هەیە.

 

ئەو شاعیرە لە 22ـی تشرینی یەکەمی ساڵی 1984 کۆچی دواییکرد و تەرمەکەی لە شاری قامشلۆی رۆژئاوای کوردستان بەخاک سپێردرا.