دیناری عێراقی. وێنە: بڵند تاهیر - رووداو
رووداو دیجیتاڵ
وەزارەتی دارایی و ئابووریی هەرێمی کوردستان لەبارەی ناردنی 700 ملیار دینار لەلایەن بەغداوە رایگەیاند، "بۆ مووچەی مانگی تەممووز تەرخان دەکرێت."
رۆژی یەکشەممە 17-09-2023 ئەنجوومەنی وەزیرانی عێراق لە کۆبوونەوەی هەفتانەی بڕیاریدا بۆ ماوەی سێ مانگ، هەر مانگی 700 ملیار دینار بۆ هەرێمی کوردستان بنێرێت، واتە بۆ سێ مانگ بڕی 2.1 تریلیۆن دینار بۆ مووچەی مووچەخۆران دەنێرێت کە بۆ دابەشکردنی مووچەی مانگەکانی 9 ، 10 و 11ـەیە.
وەزارەتی دارایی و ئابووریی هەرێمی کوردستانیش لەبارەی ناردنی ئەو 700 ملیار دینارە راگەیێندراوێکی بڵاوکردەوە و دەڵێت، ئەو 700 ملیار دینارە بۆ دابەشکردنی مووچەی مانگی تەممووز تەرخان دەکرێت.
بڕیارەکەی ئەمڕۆی ئەنجوومەنی وەزیران کێشەکان بۆ ماوەی سێ مانگ چارەسەر دەکات بۆ ئەوەی مووچەی فەرمانبەرانی هەرێمی کوردستان خەرجبکرێت. هەر ئەمڕۆ لەوبارەوە خالید شوانی، وەزیری دادی عێراق بە رووداوی گوت، "هاوتەریب لەگەڵ پێدانی مووچەی فەرمانبەرانیش، حکومەتی هەرێمی کوردستان و حکومەتی فیدراڵی لە رێگەی گفتوگۆ و دانوستانەوە بڕگەکانی یاسای بودجە بە جۆرێک لە جۆرەکان هەموار دەکەنەوە، یان چارەسەری بۆ دەدۆزنەوە".
ئەو قەرزەی ئەمڕۆ دراوە بە هەرێمی کوردستان بۆ ماوەی سێ مانگ بەردەوامدەبێت و وەزیری دادی عێراق گوتی؛ "دەبێ لەو سێ مانگەدا بگەین بە چارەسەرێکی بنەڕەتی بۆ کێشەکان، قەرزەکەش بۆ هەر مانگێک 700 ملیار دینارە، واتا بۆ مانگەکانی ئەیلوول، تشرینی یەکەم و تشرینی دووەم". دەشڵێت، "هەر ئەمڕۆ وەزیری دارایی عێراق راسپێردرا رێوشوێنە ئیداری و داراییەکان بگرێتەبەر و پارەکە بخاتە سەر هەژماری حکومەتی هەرێمی کوردستان".
وەزیری دادی عێراق دەڵێت، بەغدا هەموو پارەکە بەیەکەوە ناخاتە سەر هەژماری بانکیی حکومەتی هەرێمی کوردستان و وەکو ئاماژەی پێدەدات؛ "ئەو دوو ترلیۆن و 100 ملیار دینارەیە، لەبەرئەوەی بۆ سێ مانگە، ئەگەر عێراق بە یەکجار بینێرێت، کێشەی پارەی کاشی بۆ دروستبێت، بۆیە مانگانە 700 ملیار دەخرێتە سەر هەژماری حکومەتی هەرێمی کوردستان".
هەرێمی کوردستان، بۆ مووچە مانگانە پێویستی بە 920 - 940 ملیار دینارە، بۆ پڕکردنەوەی ئەو کورتهێنانەش، پشت بە داهاتی نێوخۆ دەبەستێت، کە مانگانە نزیکەی 300 ملیار دینارە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ