رووداو دیجیتاڵ
کۆمپانیای دی ئێن ئۆ دەستی بە بەرهەمهێنانی نەوت لە کێڵگەی تاوکێ کردەوە، بەشێکی نەوتەکەش لەڕێگەی تانکەرەوە دەگوازێتەوە کۆمپانیاکانی ناوخۆ و دەیفرۆشێت.
کۆمپانیای دی ئێن ئۆی نەرویجی کە لە چەندین کێڵگەی نەوتی لەنێوانیاندا کێڵگەی تاوکێ و پێشخابوور لە هەرێمی کوردستان کاردەکات، ئەمڕۆ (پێنجشەممە، 17-8-2023) لە راگەیێندراوێکدا ئاشکرای کرد، دەستی بە بەرهەمهێنانی نەوت لە کێڵگەی تاوکێ کردووەتەوە و، رۆژانە 40 هەزار بەرمیل نەوت لەو کێڵگەیە بەرهەمدەهێنێت.
DNO رایگەیاندووە، نەوتی بەرهەمهاتوو لە کێڵگەی تاوکێ، نیوەی رادەستی حکومەتی هەرێمی کوردستان دەکات و، نیوەکەی دیکەشی بە تانکەر دەگوازێتەوە و بە کۆمپانیاکانی ناوخۆ دەیفرۆشێت.
کۆمپانیاکە دەڵێت، بۆ ماوەی چوار مانگ لەدوای داخستنی بۆڕی نەوتی کوردستان، هیچ نەوتێکیان لە کێڵگەکانیان بەرهەمنەدەهێنا، بەڵام لە مانگی رابردووەوە دەستیان بە بەرهەمهێنانی نەوت لە کێڵگەی تاوکێ کردووەتەوە.
دی ئێن ئۆ ئاشکرای کرد، سەرەڕای ئەوەی ئێستا لە کێڵگەی تاوکێ نەوت بەرهەمدەهێنن، بەڵام هێشتا دەستیان بە بەرهەمهێنانی نەوت لە کێڵگەی پێشخابوور نەکردووە کە نزیکە لە کێڵگەی تاوکێ.
بیژەن موسەوەر رەحمانی، بەڕێوەبەری جێبەجێکاری کۆمپانیای تاوکێ لەو بارەیەوە رایگەیاند، "هەرچەندە هیچ ئاسۆیەکی روون بۆ دەستپێکردنەوەی هەناردەکردنی نەوت لەرێگەی بۆرییەوە بەدی ناکرێت، بەڵام ژمارەی ئەو تانکەرانەی نەوت لە رێگەی وشکانییەوە دەگوازنەوە بۆ بازاڕی ناوخۆ، زیادیکردووە."
کۆمپانیای دی ئێن ئۆ دەڵێت نرخی ئەو نەوتەی لە ناوخۆ دەیفرۆشن، نیوەی نرخی ئەو نەوتەیە کە پێش وەستانی هەناردەکردنی نەوتی هەرێمی کوردستان لەلایەن حکومەتی هەرێمی کوردستانەوە دەفرۆشرا.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ