رووداو دیجیتاڵ
بەرپرسێکی وەزارەتی بازرگانیی هەرێمی کوردستان دەڵێت، "ئەم هەفتەیە لە هەولێر و دهۆک و هەفتەی داهاتووش لە سلێمانی پێنجەم بەشەئاردی ئەمساڵ دابەش دەکرێت."
رۆژی دووشەممە 17-07-2023 نەوزاد شێخ کامیل، بەڕێوەبەری گشتیی بازرگانی لە وەزارەتی بازرگانی و پێشەسازیی هەرێمی کوردستان بە تۆڕی میدیایی رووداوی گوت، دابەشکردنەکە بە دیاریکراوی رەنگە سبەی لە دهۆک و چوارشەممە لە هەولێر دەستپێبکات.
بە گوتەی نەوزاد شێخ کامیل، ئەو ئاردەی دابەش دەکرێت کوالێتیی باشە و تێکەڵی گەنمی کەرکووک، گەنمی هاوردەی ئەمریکی و ئوسترالییە.
لادێ ئیبراهیم، بەڕێوەبەری تەکنیکی بەڕێوەبەرایەتیی دروستکراوی دانەوێڵەی هەولێریش ئەمڕۆ دووشەممە بە رووداوی راگەیاند، "عێراق نووسراوی کردووە کە بە دوو هەنگاو، پێنجەم بەشە ئاردی ئەمساڵ دابەشبکەین؛ سەرەتا 50٪ـی گەنم وەردەگرین و دواتر 50٪ـی دووەم وەردەگرین. ئێستا دەستمان بە وەرگرتنی گەنم کردووە کە 10٪ هاوردەی ئەمریکی و 10٪ـی دیکە ئوسترالییە و ئەوەی دەمێنێتەوە لە کەرکووک دەیهێنین."
بەڕێوەبەری تەکنیکی بەڕێوەبەرایەتیی دروستکراوی دانەوێڵەی هەولێر گوتیشی، "رۆژی چوارشەممە دابەشکردنی پێنجەم بەشەئارد دەستپێدەکات و هەر هاووڵاتییەک نۆ کیلۆ ئاردی بەردەکەوێت."
بە گوێرەی زانیارییەکانی رووداو، دابەشکردنی چوارەم بەشەئاردی ئەمساڵ لە پارێزگای سلێمانی تەواو نەبووە. دوای تەواوبوونی، بڕیارە هەفتەی داهاتوو دەست بە دابەشکردنی پێنجەم بەشەئارد بکەن.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ