سوودانی لەگەڵ نوێنەری کۆمپانیاکانی وزەی هۆڵەندا کۆبووەوە

 

ئێوارەی ئەمڕۆ پێنجشەممە نووسینگەی راگەیاندنی محەممەد شیاع سوودانی، سەرۆکوەزیرانی عێراق بڵاویکردەوە، سوودانی ئێوارەی ئەمڕۆ لەگەڵ جۆن کرۆکەر، جێگری بەڕێوەبەری جێبەجێکاری کۆمپانیای شێڵ، پاوڵ کیڵدەر، بەڕێوەبەری جێبەجێکاری کۆمپانیای ماموت کە تایبەتە بە گواستنەوە و، مارنیکس کۆتس، بەڕێوەبەری پەیوەندییەکانی حکومەت لە کۆمپانیای سیبۆڵت کۆبووەوە.

 

وەک نووسینگەکەی دەڵێت، لەمیانی دیدارەکەدا سوودانی جەختی لە پەرۆشی عێراق کردەوە بۆ پتەوکردنی هاریکاری لەگەڵ کۆمپانیا هۆڵەندییەکان کە ئەزموونی گرنگیان هەیە لە بواری وزە بە هەموو جۆرەکانیەوە، بەتایبەتی کەرتی وزەی پاک و نوێبووەوە.

 

نووسینگەی راگەیاندنی سوودانی دەشڵێت، سەرۆکوەزیران لە کۆبوونەوەکان باسیان لە پڕۆژەکانی گازی هاوەڵیش کردووە، بەتایبەتی بە دەستەبەرکردنی چەند دەرفەتێکی وەبەرهێنان بۆ ئەو کۆمپانیایانە، جگە لەو پڕۆژانەی ئێستا لە عێراق هەیانە.

 

لای خۆیەوە، نوێنەری کۆمپانیای شێڵ، وەک نووسینگەکە دەڵێت، دووپاتیکردەوە کە کۆمپانیاکە ئێستا وەبەرهێنان و پڕۆژەکانی لە کەرتەکانی گاز و وەبەرهێنانی و تەکنیکەکانی پەرەپێدانی چڕکردووەتەوە.

 

وەزارەتی پیشەسازی و کانزاکانی عێراق، رۆژی سێشەممە، 13ی شوباتی 2024، لە راگەیێندراوێکدا بڵاویکردەوە، بەهۆی گۆڕانکاری لە سیاسەتی وەبەرهێنانی پیشەسازیی پترۆکیمیایی، کۆمپانیای شێڵی هۆڵەندی داوای لێبووردنی کردووە کە ناتوانێت وەک وەبەرهێنەرێکی سەرەکی لە گفتوگۆکانی لەگەڵ وەزارەتەکانی پیشەسازی و کانزاکان و نەوت بەردەوام بێت تایبەت بە پرۆژەی نیبراس بۆ پترۆکیمیایی.

 

لەمبارەیەوە نوێنەری کۆمپانیاکە بە سەرۆکوەزیرانی عێراقی گوتووە کە گۆڕانکارییەک لە پلانەکانی کۆمپانیاکەدا روویداوە لەبارەی پڕۆژە پترۆکیمیاییەکان لە هەموو بەشەکانی جیهان، کە هۆکاری کشانەوە بوو لە پڕۆژەی نیبراس لە عێراق لەو بوارە.

 

نووسینگەی راگەیاندنی سەرۆکوەزیرانی عێراق لە کۆتایی راگەیێندراوەکەدا دەڵێت، لای خۆیانەوە کێلدەر و کۆتس سوپاس و پێزانینی خۆیان بۆ ئەو ئاسانکارییانەی حکومەتی عێراق دەربڕی کە بۆ کۆمپانیا بیانییەکان پێشکێشی کردوون.

 

بە گوێرەی راگەیێندراوی نووسینگەی سەرۆکوەزیرانی عێراق، ئەمڕۆ پێنجشەممە، 15ـی شوباتی 2024، محەممەد شیاع سوودانی، سەرۆکوەزیرانی عێراق بەسەرۆکایەتیی شاندێک بە سەردانێکی فەرمی بەرەو هۆڵەندا بەڕێکەوت.