رووداو دیجیتاڵ
وەزیری نەوتی عێراق رایگەیاند، لە بەریتانیا رێککەوتنێکی گەورەیان لەسەر چوار کێڵگەی کەرکووک کردووە کە "بەرهەمهێنان زیاد دەکات."
رۆژی چوارشەممە، 15-01-2025، حەییان عەبدولغەنی، وەزیری نەوتی عێراق لە بەریتانیاوە بە ئاژانسی هەواڵی رۆیتەرزی گوت، عێراق و کۆمپانیای نەوتی بی پی (بریتیش پیترۆڵیەم)، لە هەفتەی یەکەمی مانگی شوباتی ئەم ساڵ رێککەوتنێک لەسەر چوار کێڵگەی نەوتی و گازی کەرکووک واژۆ دەکەن.
بەگوتەی وەزیری نەوتی عێراق، ئەم رێککەوتنە لە رێککەوتنەکەی ساڵی 2023ـی کۆمپانیای تۆتەڵ ئینێرجی گەورەترە. رێککەوتنەکەی کۆمپانیای تۆتەڵ لە بەسرە کرا و بەهاکەی 27 ملیار دۆلار بوو.
حەییان عەبدولغەنی گوتی: "بەپێی رێککەوتنەکە، بەرهەمی نەوتی رۆژانە بۆ 150 هەزار بەرمیل زیاد دەکرێت."
لەدوای سعودیە، عێراق دووەم گەورەترین بەرهەمهێنەری نەوتە لە رێکخراوی ئۆپێک و رۆژانە توانای بەرهەمهێنانی نزیکەی پێنج ملیۆن بەرمیل نەوتی هەیە.
پێش ئەو لێدوانەی وەزیری نەوت؛ نووسینگەی محەممەد شیاع سوودانی، سەرۆکوەزیرانی عێراق رایگەیاند، ئێوارەی سێشەممە، 14-01-2025، رێوڕەسمێک بەڕێوەچوو بۆ واژۆکردنی رێککەوتننامەی لێکتگەیشتن بۆ جێبەجێکردنی هەڵسەنگاندنی توانای دووبارە پەرەپێدانی تەواوەتی هەر چوار کێڵگەی نەوتی کەرکووک.
بەپێی راگەیێندراوی نووسینگەی سەرۆکوەزیرانی عێراق کە 15-01-2025 بڵاویکردووەتەوە، شیاندنەوە و پەرەپێدانی هەر چوار کێڵگە نەوتییەکەی کۆمپانیای نەوتی باکوور دەدرێتە کۆمپانیای بریتش پیترۆڵیەم BPـی بەریتانی، "ئەوەش بۆ زیادکردنی بەرهەم و گەیشتن بە باشترین تێکڕای بەرهەمی نەوت و گاز."
كێڵگە نەوتییەكانی كەركووک كە بریتین لە (بای حەسەن، ئاڤانا، بابەگوڕگوڕ، جەمبوور و خەبازە) ئێستا لەلایەن كۆمپانیای نەوتی باكوور سەر بە وەزارەتی نەوتی عێراقەوە بەڕێوەدەبرێن.
لە رێوڕەسمەکەدا، حەیان عەبدولغەنی، وەزیری نەوتی عێراق ئامادە بوو. عامر خەلیل ئەحمەد، بەڕێوەبەری گشتیی کۆمپانیای نەوتی باکوور لە عێراق و زەید یاسری، بەڕێوەبەری لقی کۆمپانیای عێراقی بریتیش پیترۆڵیەم واژۆیان لەسەر رێککەوتنەکە کرد.
دوێنێ سێشەممە، سەرۆکوەزیرانی عێراق و شاندێکی یاوەری گەیشتە لەندەن و لەلایەن کیەر ستامەر، هاوتا بەریتانییەکەی پێشوازی لێکرا.
رۆژی 1ـی ئابی 2024، محەممەد شیاع سوودانی، سەرۆکوەزیرانی عێراق سەرپەرشتیی رێوڕەسمی واژۆکردنی یاداشتێکی لێکتێگەیشتنی نەوتی گشتگیری لەنێوان وەزارەتی نەوت و کۆمپانیای نەوتی بی پی کرد بۆ پەرەپێدانی کێڵگەکانی بەرهەمهێنانی نەوت و گازی کەرکووک.
یاداشتەکە لەلایەن حەییان عەبدولغەنی، وەزیری نەوت بە نوێنەرایەتیی عێراق و مورای ئۆشینکڵۆس، سەرۆکی جێبەجێکار و نوێنەری کۆمپانیاکە واژۆکرا.
کۆمپانیای بی پی لە 1920ـەوە لە کەرکووک کاری کردووە و دەڵێت، ناوچەی کەرکووک و دەورووبەری "نزیکەی 9 ملیار بەرمیل نەوتی یەدەگی هەیە."
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ