ئۆپێک: عێراق بەرهەمهێنانی نەوتی زیادکردووە

 

 

بەپێی راپۆرتی مانگانەی رێکخراوی ئۆپێک، زۆرترین زیادە لەلایەن سعودیەوە بووە کە بەرهەمی نەوتی رۆژانەی 158 هەزار بەرمیل زیادکردووە و گەیشتووەتە 10.714 ملیۆن بەرمیل رۆژانە؛ دواتر ئیمارات 48 هەزار و کوێت 47 هەزار بەرمیل نەوتی رۆژانەیان زیادکردووە. 

 

لەبارەی عێراقەوە، ئۆپێک دەڵێ، عێراق رۆژانە بەرهەمی 30 هەزار بەرمیل نەوتی زیادکردووە و گەیشتووەتە 4،496 ملیۆن بەرمیل.

 

هاوکات، گابۆن 14 هەزار بەرمیل و گینیا 13 هەزار و نایجیریا رۆژانە 6 هەزار بەرمیل نەوتیان زیادکردووە.

 

وەک لە راپۆرتەکەی رێکخراوی ئۆپێکدا هاتووە، گەورەترین دابەزینی بەرهەمهێنانی نەوت ڤەنزوێلا بووە و رۆژانە 49 هەزار بەرمیل نەوتی کەمبووەتەوە و بەرهەمی رۆژانەی 661 هەزار بەرمیلە، دواتر ئەنگۆلا 19 هەزار بەرمیل و لیبیا 11 هەزار بەرمیل و کۆنگۆ 6 هەزار و جەزائیر 3 هەزار بەرمیل نەوتی رۆژانەیان کەمبووەتەوە.  

 

رۆژی 3ـی ئابی 2022، ئیحسان عەبدولجەبار، وەزیری نەوتی عێراق لە راگەیێندراوێکدا رایگەیاند: "ئۆپێک پڵەس کار لەسەر سەقامگیریی بازاڕەکانی جیهانیی نەوت دەکات و کار بۆ کەمکردنەوەی قورسایی ئەو رکابەرایەتییە ئەمنی و سیاسی و تەندروستییانە دەکات کە رووبەڕووی جیهان بووەتەوە، جگە لە هەوڵدان بۆ بەدیهێنانی هاوسەنگی لەنێوان داوا و خستنەڕوو."

 

عێراق یەکێکە لە گەورەترین بەرهەمهێنەرەکانی ئەندامی ئۆپێک. رۆژی 1ـی ئابی 2022، وەزارەتی نەوتی عێراق داتاکانی کۆمپانیای بە بازاڕکردنی نەوت - سۆمۆی تایبەت بە بڕی نەوتی هەناردەکراو و فرۆشراوی مانگی تەممووزی رابردووی بڵاوکردەوە. 

 

بەپێی راگەیێندراوێکی وەزارەتەکە، لە مانگی رابردوودا عێراق 10 ملیۆن و 385 هەزار و 49 بەرمیل نەوتی فرۆشتووە و بەهای نەوتە فرۆشراوەکەش 10 ملیار و 608 ملیۆن دۆلار بووە.

 

بەپێی وەزارەتەکە، لە مانگی رابردوودا عێراق 99 ملیۆن و 965 هەزار و 94 بەرمیلی لە کێڵگەکانی نێوەڕاست و باشووری عێراق هەناردە کردووە و لە کێڵگەکانی کەرکووکیشەوە و بە رێگەی بەندەری جەیهانی تورکییەوە 2 ملیۆن و 344 هەزار و 536 بەرمیل نەوتی هەناردە کردووە و تێکڕای هەناردەکردنی رۆژانەشی 3 ملیۆن و 303 هەزار بەرمیل بووە؛ بەرمیلێک نەوتیشی بە 103 دۆلار و 60 سەنت فرۆشتووە.