رووداو دیجیتاڵ
لە مانگی نیساندا هەڵاوسان لە ئەمریکا بۆ 11یەمین مانگ لەسەریەک و نزمترین ئاستی لە دوو ساڵی رابردوودا دابەزی، ئەوەش گوشارەکان بۆ زیادکردنی سوودی بانکی لە لایەن بانکی ناوەندییەوە کەم دەکاتەوە.
وەزارەتی کاری ئەمریکا رۆژی سێشەممە، 13-06-2023، بڵاویکردەوە، لە مانگی ئایاردا هەڵاوسان لەسەر ئاستی ساڵانە 4٪ بووە، بەوەش بەراورد بە مانگی نیسان نزیکەی 1٪ کەمبووەتەوە، کاتێک لەو مانگەدا 4.9٪ بوو. ئەمە نزمترین ئاستی هەڵاوسانە لە ئەمریکا لە مانگی ئاداری ساڵی 2021ـەوە.
وەزارەتەکە دەشڵێت، لەسەر ئاستی مانگانەش هەڵاوسان 0.1٪ بەرزبووەتەوە، لەکاتێکدا لە مانگی پێشتر 0.4٪ بەرزبووەوە. ئامارەکە لەکاتێکدایە، بڕیارە ئەمڕۆ سێشەممە بانکی ناوەندیی ئەو وڵاتە کۆبوونەوەی دوو رۆژەی خۆی بۆ مانگی ئایار دەستپێبکات و سبەی شەویش کاژێر 21:00 بە کاتی هەولێر بڕیاری خۆی بۆ زیادکردن یان هێشتنەوەی رێژەی سوودی بانکی بە جێگیری بدات.
دەکرێت کەمبوونەوەی هەڵاوسان ببێتە هۆکارێک بۆئەوەی بانکەکە رێژەی سوودی بانکی وەک خۆی بهێڵێتەوە، بەڵام دەشکرێت سیاسەتداڕێژەرانی بانکەکە هێشتا بەدوای ئاراستەیەکی جێگیرتری گەشەی ئابوورییدا بگەڕێن بەر لەوەی دەست لە زیادکردنی سوودی بانکی هەڵبگرن.
لە ساڵی رابردووەوە و دوای هێرشی رووسیا بۆ سەر ئۆکراینا، بانکی ناوەندیی ئەمریکا 10 جار سوودی بانکی زیادکردووە؛ حەوت جار لە ساڵی 2022 و سێ جاریش ئەمساڵ، ئەوەش دوای بەرزبوونەوەی هەڵاوسان لەو وڵاتە کە لە مانگی حوزەیرانی 2022ـدا بۆ بەرزترین لە 40 ساڵی رابردوودا بەرزبووەوە و گەیشتە 9.1٪.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ