رووداو دیجیتاڵ
وەزیرى نەوتى عێراق دەڵێت، دانوستاندن لەگەڵ تورکیا دەکەن بۆ دەستپێکردنەوەى هەناردەى نەوت لە رێگەى بەندەرى جەیهانەوە. ئاماژە بەوەش دەکات، رۆژانە چوار ملیۆن بەرمیل نەوت بەرهەم دەهێندرێت و سێ ملیۆن و 400 هەزار بەرمیلی لێ هەناردە دەکرێت.
حەیان عەبدولغەنی، وەزیرى نەوتى عێراق رایگەیاند، "گازى وەبەرهێندراو بۆ 63% بەرزبووەتەوە و رۆژانە گەیشتووەتە یەک ملیار و 900 ملیۆن پێ سێجا." گوتیشى، "رۆژانە یەک ملیار پێ سێجا گاز دەسووتێت."
یەکێک لە ئاڵنگارییەکانى بەردەم وەزارەتى نەوت، سووتانى گازى هاوەڵى کێڵگەکانى نەوتە. جگە لە بەفیڕۆچوونى ئەو وزەیە، کاریگەریشی لەسەر پیسبوونى ژینگە دەبێت.
وەزیرى نەوتى عێراق رایگەیاند، "سووتانى گازى هاوەڵ بە تەواوى لە ساڵی 2028 تاوەکو 2030 نامێنێت و لە داهاتوویشدا عێراق پێویستى بە هاوردەکردنى گاز نابێت."
عێراق رۆژانە 3.1 ملیار پێ سێجا گاز بەرهەم دەهێنێت، 2.9 ملیار پێ سێجا بەراورد بە 2022 زیاتر بووە.
حەیان عەبدولغەنی بە میدیاى فەرمیى عێراقى گوت، "یەدەگی گازى عێراق بە 140 تریلیۆن پێ سێجا مەزەندە دەکرێت."
وەزیرى نەوت ئاماژەى بەوەش دا، عێراق رۆژانە 21 ملیۆن لیتر بەنزین بەرهەم دەهێنێت، لە کاتێکدا رۆژانە 28 ملیۆن لیتر بەنزین بەکاردەهێندرێت و 50%ى بەنزین بە نرخى پاڵپشتیکراو لەلایەن حکومەتەوە دابین دەکرێت.
بەگوێرەى یاسای بودجەى گشتیى عێراق، پێویستە رۆژانە سێ ملیۆن و 500 هەزار بەرمیل نەوت هەناردە بکرێت بۆ پڕکردنەوەى پارەى بودجە کە بۆ 2024 دەگاتە 211 تریلیۆن دینار.
وەزیری نەوتى عێراق گوتی، عێراق رۆژانە چوار ملیۆن بەرمیل نەوت بەرهەم دەهێنێت، سێ ملیۆن و 400 هەزار بۆ سێ ملیۆن و 450 هەزار بەرمیلی هەناردە دەکات.
حەیان عەبدولغەنى گوتیشی، "هیوامان وایە رێگەی هەناردەکردنى نەوت زیاتر بکەین؛ دانوستاندن لەگەڵ تورکیا دەکەین بۆ دەستپێکردنەوەى هەناردەى نەوت لە رێگەى بەندەرى جەیهانەوە."
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ