Hewlêr (Rûdaw) - Serokê Amerîkayê Donald Trump hem Îran hem jî Hûsî kirin hedef û got, "Hem Hûsî hem jî piştgirên wan li Îranê hîn êşa rastîn tam nekirine."
Serokê Amerîkayê Donald Trump hişyariyeke din da Hûsiyan.
Donald Trump li ser hesabê xwe yê Social Truthê daxuyaniyek belav kir.
Trump di daxuyaniya xwe de Trump got, "Ji bo Hûsiyan bijarde zelal e: Guleberdana li keştiyên Amerîkî rawestînin û em dê gulebarana li we rawestînin. Hem Hûsî hem jî piştgirên wan li Îranê hîn êşa rastîn tam nekirine."
"Em dê hêza kujejende bi kar bînin"
Serokê Amerîkayê Trump, di daxuyaniya xwe de Hûsiyên li Yemenê û Îran kiribû hedef û gotibû, "Îro min fermana destpêkirina operasyoneke leşkerî ya bibiryar û bihêz li dijî terorîstên Hûsî yên li Yemenê da artêşa Dewletên Yekbûyî."
Trump îdia kir ku Hûsî keştiyên Amerîkayê dikin hedef û bandoreke neyînî li bazirganiya deryayî ya herêmê dikin û wiha got:
"Ti carî dê li êrişên li dijî keştiyên Amerîkayê astengî neyê kirin. Heta ku em bigihîjin armanca xwe em ê hêza kujende bi kar bînin.
Dema we qediya, ji îro û pê ve divê êrişên we rawestin, yan na dê bi awayekî ku we berê qet nedîtibe dozexek bi ser we de bibare."
"Me droneke Amerîkayê xist"
Ji Hûsiyan gaveke ku dê Trump û îdareya wî hêrs bike hat dan.
Berdevkê leşkerî yê Hûsiyan Yahya Sare ragihand ku wan droneke MQ-9 a Amerîkayê xistiye.
Sare di daxuyaniya xwe ya ku ji aliyê televîzyona al-Masirah a Hûsiyan ve hat weşandin de got:
"Parastina me ya hewayî droneke Amerîkî ya MQ-9 ku li ser herêma Maribê digeriya bi bikaranîna mûşekeke ku bi xwecihî hatiye hilberandin xist xwarê.
Ev 16emîn drona Amerîkayê ye ku ji Çiriya Pêşîn a 2023yan ve ji aliyê parastina me ya hewayî ve bi serkeftî hatiye xistin."
Sare her wiha zêde kir ku "heta ku dorpêç û êrişên li ser Xezeyê bi dawî bibin dê dewam bikin keştiyên dijmin ên li Deryaya Sor û Deryayên Erebî bikin hedef."
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse