Hewlêr (Rûdaw) - Li gor amarên ku Wezareta Tendirustî ya Tirkiyê pêşkêşî Rêxistina Tendirustî ya Cîhanî kirine, di 5 mehên destpêkê yên 2023an de li wî welatî hejmara kesên bi nexweşiya Sorikê ketine gehiştiye zêdeyî 2 hezar kesan. Lê tê pêşbînî kirin hejmare zêdetir be, lewra daxwaz tê kirin ku tedbîrên pêwîst bên wergirtin.
Li Tirkiye û Bakurê Kurdistanê ji ber wernegirtina vaksînê, koçên bê kontrol û vaksînên ku bandora wan lawaz e her diçe hejmara kesên bi nexweşiya sorikê dikevin zêdetir dibe û metirsî heye demsala zivistanê ew nexweşê zêdetir berbelav bibe.
Baskê Pizîşkên Malbatê ya Yekîtiya Pizîşkên Tirk (TTB) dibêje bi taybetî li bajarên wek Stenbul, Bursa, Enqere, Îzmir, Edene, Manîsa, Mugla û Zonguldakê yên Tirkiyê û Semsûr, Amed, Erzerom û Wan ên Bakurê Kurdistanê hejmara kesên bi nexweşiya sorikê ketine zêde bûye û 2 hezar kes derbas kiriye.
Pizîşk di vê derbarê de nîgeraniya xwe tînin ziman û ji Wezareta Tendirustiyê daxwaz dikin ku tedbîrên bilez bên wergirtin û dibêjin: “Ligel vebûna dibistanan eger heye ew nexweşî zêdetir belav bibe.”
Baskê Pizîşkên Malbatê ya Yekîtiya Pizîşkên Tirk (TTB) li ser hesabê xwe yê Twitterê dibêje: "Li gor rapora ku Wezareta Tendirustiyê pêşkêşî Rêxistina Tendirustî ya Cîhanî kiriye, li Tirkiyê di 5 mehên destpêkê yên îsal de hejmara kesên bi nexweşiya sorikê ketine gehiştiye 2 hezar û 51 kesan. Ji meha Çile ve hejmara kesên bi sorikê ketine zêde bûye. Di mehên havînê de hinekî kêmtir bû, lê em pêşbînî dikin zivistanê dîsan hejmar zêde bibe."
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse