HDPê parastina xwe da Dadgeha Destûra Bingehîn

Hewlêr (Rûdaw) - Parastina li dijî doza girtina HDPê hat amadekirin, îro 19ê Nîsanê pêşkêşî Dadgeha Destûra Bingehîn hat kirin. 

Komîsyona Hiqûqê û Mafê Mirovan a HDPê û grûba hiqûqnas a "Em HDPê diparêzin", parastina derbarê doza girtina HDPê de ku amade kiribûn, pêşkêşî Dadgeha Destûra Bingehîn kirin.   

Dadgeha Destûra Bingehîn li Tirkiyê bilindtirin dadgeh e û li dijî biryarên wê sikala û doz nayên tomar kirin. Lê eger ji 15 endamên dadgehê 10 jê dengê erê bidin û HDP bê girtin komisyona hiqûqê ya HDPê dikare li dadgeha mafên mirov a Ewropayê skalayekê tomar bike.

Dadgeh piştî lêkolîna li ser parastina HDPê, dê rojekê diyar bike ku li ser dozê biryarekê bidin.

HDP sêyemîn fraksyona herî mezin e li Parlamentoya Tirkiyê û di hilbijartina dawî ya parlamentoyê de ku sala 2018an hat kirin, ji sedî 11.7ê dengan bidest xistin û ji 600 kursiyên parlamentoyê 67 kursî birin.

Di vê gera parlamentoyê de mafê parlamenteriyê ji sê parlamenterên HDPê hatiye standin û hinek parlamenter jî ji fraksyonê derketine. Li Parlamentoya Tirkiyê niha 57 kursiyên HDPê hene.

• Parve bike li ser
• Share on Facebook
• Share on Twitter
• Share on Whatsapp
• Share on Telegram
• Share on Viber
• Share on Messenger