Hewlêr (Rûdaw) – Rêveberiya Komeleyên Demokratîk ên Elewiyan têkildarî êrişa nijadperest a li dijî xwendekarê Kurd ê Elêwî daxuyanî da, “Eger berpirsên bûyerê neyên darizandin dê rê li ber êrişên din were vekirin.”
Li şevîmana Zanîngeha Koçê ya Stenbolê xwenderakarek ji ber ku Kurd û Elewî ye 2 kesên nijadperest ên ku di odeya wî de diman şkence lê kir û bi kêran ew birîndar kir, herwiha wan hewl da bi utuyê rûyê wî bişewitîne.
Rêveberiya Komeleyên Demokratîk ên Elewiyan (DAD) têkildarî bûyerê li avahiya xwe civîneke çapemeniyê li dar xist û daxuyaniya da.
Daxuyanî ji aliyê Hevseroka Cemxaneya Dayika Fatmayê Melehat Tekeyê ve hat xwendin.
“Li dijî Kurdan, Elewiyan û penaberan herî kêm 208 êrişên hatine kirin”
Melehat Tekeyê destnîşan kir ku sala 2023yan li dijî Kurdan, Elewiyan û penaberan herî kêm 208 êrişên nijadperest û cihêkariyê hatin kirin.
Tekeyê êrişa nijadperest bi bîr xist û got, “Êrişa li Zanîngeha Koçê yek ji van êrişan e.”
Tekeyê herwiha destnîşan kir ku piştî bûyerê di zanîngehê de lêpirsîneke adîlane nehatiye meşandin û ji Rêveberiya Zanîngehê pirsî:
“We têkildarî bûyerê çi kir. We dengên ku hatine tomarkirin çawa nirxand. Gelo we serî li rêya girtina bûyerê daye?”
“Kurd xwediyê van axan in”
Tekeyê herî dawî got:
“Divê zanîngeh bi lezgînî bersiva pirsên me bide. Eger berpirsên bûyerê neyên darizandin dê rê li ber êrişên olperest û netewperest bêne vekirin.
Kurd û Elewî xwediyê van axan in. Dê ti ferasetên nijadperest nikare rastiya van axan a pirrengî bike yek reng.”
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse