Hewlêr (Rûdaw) - Li parêzgeha Sêrtê ya Bakurê Kurdistanê, sala 2016an li Geliyê Botanê pelîtanka (minminîk) a pêşeng a spî (belenois aurota) hat dîtin û paşê jî hat qeydkirin.
3 çavdêrên pelîtankan ji bo ku dîmenê pelîtankê bigirin ji Îzmirê çûn Sêrtê.
Çavdêrê pelîtakan Nîhat Kaymaz pelîtanka pêşeng a spî (belenois aurota) ya ku ji Afrîkayê koç kiriye 2016an li Sêrtê dît û qeyd kir.
Pelîtanka ku piştî 7 salan par hatibû dîtin, îsal dîsa jî hat dîtin û dîmenên wê hatin girtin.
Hezar û 590 kîlometre li paş xwe hiştin
Melîh Înanli, Mustafa Kuş û Îbrahîm Kavuş ji bo ku pelîtakê bibînin û dîmenê wê bigirin, hezar û 590 kîlometre rê li paş xwe hişt û ew çûn Sêrtê.
Melîh Înanliyê ku ji 2004an vir ve wêneyê pelîtankan digire got ku wî dema dîtina pelîtankê bihîst, bilêta balafirê birî û bi hevalên xwe re çû Sêrtê.
Cara ewil e dibîne
Înanli destnîşan kir, ew ji bo pelîtanka pêşeng a spî berî niha jî 3 caran çûye bajêr lê wî pelîtank nedîtiye.
Înanli her wiha da zanîn ku li Tirkiye û Bakurê Kurdistanê nêzîkî 415 cureyên pelîtankan hene û got:
“Min wêneyên 300 pelîkankî girtin. Min di serdanên xwe yên borî de, wêneyê pelîtanka pêşeng a spî negirtibû. Ez vê carê tenê ji bo wê hatim."
“Dîtina pelîtankê hesteke xweş bû”
Mustafa Kuş jî da zanîn ku ew wênegirê çûkan e lê ev nêzîkî 10 salan e wêneyên pelîtankan jî digire û got:
“Em hatin Sêrtê ji bo ku pelîtanka pêşeng a spî bibînin. Cara yekem e ku ez têm vir, cihekî pir xweş e.
Dema me pelîtanka pêşeng a spî dît coş û hesteke xweş li ba me çêbû.
Pelîtanka pêşeng a spî, pir xweşik e û taybet a Sêrtê ye. Bi rastî jî kêfxweşiyeke mezin e ku mirov vê pelîtankê li cihê wê bibîne û wêneyên wê bigire.”
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse