Wêne: Sîdar Can Eren
Hewlêr (Rûdaw) – Li parêzgeha Dêrsimê ya Bakurê Kurdistanê sala nû “Gaxan” hat pîrozkirin.
Şahiya Gaxanê li gor salnameya Hicrî wekî roja destpêka sala nû tê qebûlkirin û her sal hefteya dawî ya Kanûna Pêşînê û hefteya pêşî ya Kanûna Paşînê tê pîrozkirin.
Li Dêrsimê bi pêşengiya Şaredariya Dêrsimê, roja Gaxanê hat pîroz kirin.
Tîma pîrozbahiyê bi cilên gelêrî daket kolanan û lokma berhev kirin.
Piştre bi dahol û zirneyan di nav coş û kêfxweşiyê de heta Qada Seyîd Rizayê meşiyan.
Li qadê lîstikên gelêrî hatin lîstin, ji bo ku sala nû aramiyê bîne çira hatin pêxistin û lokma hatin belavkirin.
“Di çanda me de Gaxan pîrozbahî ye”
Endamê Komeleya Gureşanê Umît Karabulut got:
“Em di meha Gaxanê de ne. Beriya me jî Gaxan dihat pîrozkirin. Me jî xwest, di nava civaka me de were dîtin.
Di Gaxanên berê de, diçûn malan û diyarî belav dikirin. Em îro geriyan, me lokma berhev kirin û bi kesên xizan re parve kirin.
Di çanda me de Gaxan serdan û pîrozbahî ye.”
Beşdara pîrozbahiya Gaxanê Zulfîkar Esmer got, “Ev çand ber bi winda bûnê ve diçe. Ciwan nizanin û em jî dixwazin ev çand were parastin.”
Welatiyê bi navê Muslum Hambayat jî got:
“Em her sal Gaxanê pîroz dikin. Bila miletê me baş be, bila îqrar, pîrozbahî û hevalên me hertim baş bin. Bila ev çand berdewam bike.”
Şahiyên Gaxanê di serî de li Dêrsimê û li parêzgehên wekî Sêwaz, Erzingan, Çewlîg û Mûşê yên Bakurê Kurdistanê tên sazkirin.
Gaxan li gorî baweriya Elewiyan roja destpêkirina îbadetên wan e û ev îbadet 3 mehan berdewam dike.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse