Ziryan Rojhilatî / Wêne û Vîdeo: Rûdaw
Hewlêr (Rûdaw) - Birêvebirê Navenda Lêkolînan a Rûdawê Ziryan Rojhilatî diyar kir, “Hewlêra dîrokî ya Kurdistanê bûye navenda hevdîtina gelek çand û şaristaniyên li vê herêmê.”
Foruma Hewlêrê ya Sêyemîn îro dest pê kir û dê heta 28ê vê mehê biajo.
Navenda Lêkolînan a Rûdawê, bi hevkariya bi hinek navendên lêkolînê û dezgehên navdar ên li Rojhilata Navîn û cîhanê re vê forumê li dar dixe.
Forum dê bi sernavê "Nedilniyayiyên Asêmayî di Paşeroja Rojhilata Navîn de" tê encamdan.
Birêvebirê Navenda Lêkolînan a Rûdawê Ziryan Rojhilatî Ziryan Rojhilatî axaftina vekirinê kir.
Hemû axaftina Ziryan Rojhilatî wiha ye:
“Rêzdar, beşdarên hêja!
Beyaniya we baş be û hûn bi xêr hatin Civîna Salane ya Sêyem a Navenda Lêkolînan a Rûdawê. Ev ji bo min û hevkarên min ên li Tora Medyayî ya Rûdawê şanazî û berpirsyariyek mezin e ku îro di demeke hestiyar de ku Rojhilata Navîn tê re derbas dibe, li Hewlêra dîrokî ya Kurdistanê, cihê ku bûye navenda hevdîtina gelek çand û şaristaniyên li vê herêmê deriyê diyalogeke piralî li ser mijarên cuda vekin.
Ez bawer im ku rûniştina civîna me ya salane, bi beşdariya we rêzdaran dê gaveke din a taybet be ji bo pêşvebirina çanda diyalogê di dema nakokiyan de, li herêmeke ku gelek sal in ji ber karesatên şer û pevçûnan êşê dikişîne.
Civîna Hewlêr 2025ê di demekê de tê lidarxistin ku Rojhilata Navîn di navenda guherînên jeopolîtîkî yên cîhanê, pirsgirêkên ewlehiyê û guherînên aborî û civakî de ye. Astengiyên niha yên şer, guherîna avhewayê li gel guherînên siyasî, aborî û civakî, bi hev re çend qatên nedilniyayiyê li ser paşeroja vê herêmê kom kirine.
Tev li şerê li Rojhilatê Ewropayê û îhtimala aloziyê li deverên din ên cîhanê, bûyerên piştî 7ê Çiriya Pêşîn a 2023yan, rûxîna rejîma Beasê li Sûriyeyê, Rojhilata Navîn xistine ber zincîreyeke bûyerên girîng ku ji têkoşîna çekdarî, guherîna hevpeymaniyên siyasî heta bi îhtimala destpêkirina şerên din, gelek mijarên berfireh dihewîne.
Di 5 salên dawî de zêdetirî ji sedî 14 ji tevahiya bûyerên tundiyên organîzekirî yên li cîhanê li vê herêmê çêbûn û tenê sala borî jî ew rêje ji sedî 20ê tevahiya tundiyên organîzekirî yên cîhanê bû. Ev ji bo herêmeke ku erdnîgariya wê tenê ji sedî 5-6ê rûberê cîhanê ye, gelekî zêde ye. Li gel wê jî ji aliyê siyasî ve, guherîna hevpeymanî û nakokiyên herêmê, digel rola hêzên mezin ên cîhanê, nedilniyayî ji bo paşeroja vê herêmê zêdetir kirine.
Dema ku cemserîbûnên hêz û îdeolojîk li cîhanê û li Rojhilata Navîn zêde bûne, rola takekesan û rêberên bihêz li şûna dezgehan jî zêdetir bûye, ev yek jî zêdetir ji her devereke din li vê herêmê tê dîtin. Lewma vekirîhiştina deriyê diyalogê, zêdetir ji her demekê ji bo vê herêmê girîng e.
Ji aliyê aborî ve, rêjeya mezinbûna GDP li vê herêmê ji ber beşdariya welatên hilberînerên petrolê yên li Kendavê zêde bûye lê di rastiyê de bilindkirina asta enflasyon û bihabûnê, qeyrana diravî, nedilniyayiya bazara enerjiyê û mijarên reformên aborî digel astengiyên jîngehî wekî qeyrana avhewayê, qateke din ji nedilniyayiyan ji bo paşeroja vê herêmê zêde kirine.
Bi heman rengî, herêm ji aliyê demografîk û civakî ve di werguherînekê de ye û şiyana dewletan ji bo dabînkirina pêdiviyên nifşê nû cihê nîqaşê ye. Mezinbûna zû ya şêniyan, mijarên çewisandin û agahiyên şaş, mijarên civakî wekî rola ciwanan û jinan di civakên vê herêmê de, mijarên bikaranîna madeyên hişbir û sûcên organîzekirî li vir, êdî ne tenê rehendeke neteweyî ji bo welatan heye, belkî wekî mijareke mezin a navneteweyî jî lê hatiye.
Foruma Hewlêr 2025 bala xwe datîne ser wan û bi beşdariya we ya hêja û zêdetirî 120 mêvanên derve ji welatên cûrbicûr ên cîhanê ve, hewl dide wêneyeke giştî li ser rewşa niha û deriyên derketinê ji wan nedilniyayiyên asêmayî derxe holê. Bê guman ev jî pêk nedihat eger piştgiriya hevbeşên me nebûya ku em bi hev re ramanan bikin yek da ku em Foruma Hewlêrê bi ser bixin.
Em serbilind in ku Serokkomarê Îraqê Birêz Dr. Ebduletîf Reşîd, Serokê Parlamentoya Îraqê Birêz Dr. Mehmûd Meşhedanî, Serokwezîrê Îraqê Birêz Mihemed Şiya Sûdanî, Serokê Herêma Kurdistanê Kak Nêçîrvan Barzanî, Alîkarê Serokwezîrê Herêma Kurdistanê Qubad Talebanî, li gel hejmareke berbiçav ji berpirsên bilind ên siyasî li gel dîplomat û zana û şîrovekarên navxweyî û derve, bi amadebûn û beşdariya xwe, alîkariya me dikin ku em nîqaşeke kûr û berfireh bikin.
Di dawiyê de, cihê xwe ye ku ez spasiya sponsorên Foruma Hewlêrê bikim ku beşek ji erkên me sivik kirin.
Her wiha spasiya bêdawî ji bo hemû hevkarên xwe li Tora Medyayî ya Rûdawê, li gel tîmeke ji xwebexşan li Zanîngeha Kurdistanê ya Hewlêrê ku di dema borî de bêrawestan xebitîn da ku ev forum bi ser bikeve. Piştgiriya piraniya wan ku wekî leşkerên veşartî li paş in, cihê rêz û pesindanê ye.
Hûn careke din bi xêr hatin. Bi hêviya nîqaşeke bi destkeftî.”
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse