Koça ciwanên Şirnexê ya ber bi bajarên Tirkiye û Ewropayê ve jî roj bi roj zêde dibe
Hewlêr (Rûdaw) - Li Bakurê Kurdistanê, yek ji pirsgirêkên serekî nebûna kar e.
Li ser asta Tirkiyeyê rêjeya herî zêde a bêkaran li bajarên Bakurê Kurdistanê ne û Şirnex jî di nava wan bajaran de ye ku hejmara gêncan lê zêde ye û lê kar nîne.
Parêzgeha Şirnexê di nifûsa ciwanan de duyem parêzgeh e lê di bêkarî û pêşketina aborî de di rêzên dawiyê de ye.
Parlamenterê DEM Partiyê yê Şirnexê Mehmet Zekî Îrmez li ser bêkariya li Şirnexê li Parlamentoya Tirkiyeyê daxuyaniyek da çapemeniyê û piştre li ser wê mijarê ji Rûdawê re jî axivî.
Mehmet Zekî Îrmez got ku divê hikûmet gavên pêwîst bavêje û derfetên kar dabîn bike.
Nifûsa Şirnexê zêdeyî 557 hezar kes e.
Ji sedî 21,7ê wê nifûsê ciwanên di temênê 15-24 salî de ne.
Li gorî TÛÎKê rêjeya bêkariyê li parêzgehê derdora ji sedî 30 e û ew rêje di nav ciwanan de ji sedî 37 e.
Li gorî raporeke sala 2022an a Parêzgariya Şirnexê li wî bajrî û navçeyên wê 36 hezar û 729 bêkarên tomarkirî hene.
Ji ber nebûna derfetên kar, koça ciwanên Şirnexê ya ber bi bajarên Tirkiye û Ewropayê ve jî roj bi roj zêde dibe.
Parlamenterê DEM Partiyê bangî hikumetê û aliyên peywendîdar kir ku ji bo bêkariya li Şirnexê pêngavên pêwîst biavêjin.
Çavakaniyên sereke yên dahata Şirnexê ajeldarî, çandinî, kanên komir û bazirganiya sînor e.
Vê dawiyê bi bîrên xwe yên petrolê jî derdikeve pêş û xelkê parêzgehê li bendê ne ku hikûmet di van waran de zêdetir veberhênanê bike.
Lê heta niha xelkê wê deverê, sûdek ji dahata petrolê nedîtiye.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse