Hewlêr (Rûdaw) – Serokwezîrê Herêma Kurdistanê Mesrûr Barzanî, piştî hevdîtina bi Heyeta Îmraliyê ya DEM Partiyê re got ku Herêma Kurdistanê ji bo bidawîkirina şer amade ye ku her cure hevkarî û piştgiriyê bike.
Serokwezîrê Herêma Kurdistanê Mesrûr Barzanî îro li Hewlêrê Şandeya DEM Partiyê ya Îmraliyê pêşwazî kir.
Hevdîtin li Serokwezîriya Herêma Kurdistanê pêk hat û nêzîkî 45 xulekan berdewam kir.
Serokwezîriya Herêma Kurdistanê derbarê hevdîtinê daxuyanî da.
Li gorî daxuyaniyê, Şandeya DEM Partiyê ya Îmraliyê kêfxweşiya xwe ji serdan, hevdîtinan û civînên xwe yên li Herêma Kurdistanê nîşan daye.
Şandeyê derbarê armanca serdana xwe û hewlên xwe yên ji bo pêvajoya aştiyê ya li Tirkiyeyê nêrîna xwe pêşkêşî Mesrûr Barzanî kirine.
Şandeya Îmraliyê her wiha tekezî li ser wê yekê kiriye ku niha li Tirkiyeyê pêvajoyeke nû dest pê kiriye û çareseriya aştiyane ya pirsgirêka Kurdan bûye mijareke girîn a rojevê.
Li gorî daxuyaniyê, Şandeya DEM Partiyê ya Îmraliyê daye zanîn ku ew di vê pêvajoyê de nirx û rêzeke mezin didin rol û piştgiriya Serok Mesûd Barzanî.
"Divê ji her derfetê sûd were wergirtin"
Mesrûr Barzanî jî ji bo xurtkirina aştî, aramî û pêkvejiyana aştiyane û biratiya di navbera gelên herêmê de tekezî li ser girîngiya sûdwergirtina ji her derfetê kiriye.
“Em ji bo her cureyê piştgiriyê amade ne”
Mesrûr Barzanî careke din piştgiriya xwe ya ji bo pêvajoya aştiyê ya li Tirkiyeyê anî zimên û got:
“Divê şer û tundî bi dawî bibin. Herêma Kurdistanê di vê mijarê de ji bo her cureyê hevkarî û piştgiriyê amade ye.”
Divê were gotin ku Heyeta Îmraliyê ji Pervîn Buldan û Sirri Sureyya Onder, Hevserokê DBPyê Keskîn Bayindir, endamên Buroya Hiqûqê ya Sedsalê Ozgur Erol û Îbrahîm Bilmez, Hevberdevkê Komîsyona Pêwendiyên Derve ya DEM Partiyê Berdan Ozturk û parlamenterên DEM Partiyê Gulcan Kaçmaz Sayyîgît û Mehmet Kamaç pêk tê.
Şandeya DEM Partiyê ya Îmraliyê hevdîtinên xwe yên li Başûrê Kurdistanê qedandin û dê îro vegere Tirkiyeyê.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse