Huseyîn Olan û Nalîn Hesen / Wêne û Vîdeo: Rûdaw
Hewlêr (Rûdaw) - Parlamenterê DEM Partiyê yê Bedlîsê Huseyîn Olan got, “Peyama Birêz Mesûd Barzanî ji bo gelê Bakur pîroz e.”
Şandeya DEM Partiyê ya Îmraliyê piştî hevdîtinên xwe yên bi Abdullah Ocalan re serdanên xwe didomîne.
Heyeta Îmraliyê di çarçoveya van hevdîtinan de hat Başûrê Kurdistanê.
Heyet doh bi Serok Mesûd Barzanî re civiyabû û îro jî bi Serokê Herêma Kurdistanê Nêçîrvan Barzanî re civiya.
Parlamenterê DEM Partiyê yê Bedlîsê Huseyîn Olan ji bû mêhvanê Nûrojê û ev ziyaret û mijarên pêwendîdar nirxandin.
Parlamenterê DEM Partiyê yê Bedlîsê Huseyîn Olan da zanîn ku Peyama Serok Barzanî ji bo gelê Bakurê Kurdistanê gelekî girîng û pîroz e û ji bo pêvajoya aştiyê ew alîkariyê ji Serok Barzanî û Serokê Herêma Kurdistanê Nêçîrvan Barzanî dixwazin.
Huseyîn Olan got ku divê li Bakurê Kurdistanê aştiyeke mayînde bê kirin û dawî li şerê 40 salî were.
Parlamenterê DEM Partiyê yê Bedlîsê daxuyand, ew bi naveroka peyama Ocalan nizanin lê ew di wê baweriyê de ye ku Ocalan daxwaza alîkariyê ji Serok Barzanî û Hikûmeta Herêma Kurdistanê dike da ku bibin navbeynkar û pêvajoyeke nû ya aştiyê pêk were.
Olan bal kişand ser “rola Herêma Kurdistanê ya di gotûbêjên ji bo pêvajoya aştiyê de” û diyar kir ku eger Hikûmeta Herêma Kurdistanê piştgiriyê bide pêvajoyê dê baweriya gelê Kurd jî zêde bibe.
Olan diyar kir, eger ev pêvajo here serî dê bandorê li her çar perçeyên Kurdistanê bike û got:
“Eger derfet hebe û Hikûmeta Herêma Kurdistanê bibe alîkar belkî Heyeta Îmraliyê karibe here Rojavayê Kurdistanê jî.”
Huseyîn Olan eşkere kir ku dema Heyet ji Başûr Kurdistanê vegere dê dîsa here Îmraliyê û pişt re dê Ocalan peyama xwe belav bike.
Li gorî pêşbîniyên Olan, Ocalan dê di payama xwe de bixwaze ku Rojavayê Kurdistanê were naskirin û mafên Rojavayê Kurdistanê werin misogerkirin.
Parlamenterê DEM Partiyê nêzîkbûna Tirkiyeyê ya li hemberî pêvajoya aştiyê bi gotinên, “Wisa xuya dike ku Tirkiye di vî karî de cidî ye lê heta îro ev cidîbûn nîşan nedaye” nirxand.
#VÎDEO - Parlamenterê DEM Partiyê yê Bedlîsê Hûseyîn Olan got:
— RudawKurdi (@RudawKurdi) February 17, 2025
🎙️ Peyama Birêz Mesûd #Barzanî ji bo gelê Bakur pîroz e
🎙️ Xwesteka gelê Bakur yekîtiya Kurdan e
🎙️ Em alîkariya Birêz Nêçîrvan Barzanî û Birêz Mesûd Barzanî dixwazin
🎙️ Haya me ji naveroka peyama Birêz #Ocalan… pic.twitter.com/sOrDd1jl7G
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse