Hewlêr (Rûdaw) - Rêveberiya Xweser ragihand, “Eger hikûmet dorpêça li ser Şehba û taxên Kurdan ên li Helebê raneke dê teqîneke civakî çêbibe.”
Rêveberiya Xweser a Rojavayê Kurdistanê, hişyarî da Hikûmeta Sûriyeyê got ku eger ew dorpêça xwe ya li ser navçeya Şehbayê û taxên Kurdan ên li Helebê raneke dê teqîneke civakî çêbibe.
Ev hişyarî ji aliyê Alîkarê Hevserokatiya Encûmena Rêveberiya Xweser a Bakur û Rojhilatê Sûriyeyê Hesen Koçer ve hat dayîn.
Koçer eşkere kir ku wan çend caran bi Şamê re ev pirsgirêka dorpêça li ser Şehba û taxên Kurdan ên li Helebê gotûbêj kiriye.
Hesen Koçer destnîşan kir ku Hikûmeta Sûriyeyê ti bersiva erênî nedaye û dorpêça xwe domandiye.
“Dê teqîneke civakî çêbibe”
Koçer bangî Hikûmeta Sûriyeyê kir ku dev ji siyaseta dorpêçkirina herêmên Kurdan û birçîhiştina xelkê sivîl berde û got, “Eger na dê teqîneke civakî çêbibe li dijî hikûmetê.”
Ev zêdeyî du salan e Firqeya 4an a artêşa Sûriyeyê navçeya Şehbayê û taxên Kurdan Şêx Meqsûd û Eşrefiye dorpêç kirine.
Di encama vê dorpêçê de rewşa aborî, tenduristî û debara xelkê sivîl zêde xirab bûye.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse