Nêçîrvan Barzanî û Senatora Amerîkayê Elissa Slotkin\ Wêne: Serokatiya Herêma Kurdistanê
Hewlêr (Rûdaw)- Serokê Herêma Kurdistanê Nêçîrvan Barzanî li Munîhê bi Senatora Amerîkayê Elissa Slotkinê re civiya.
Senotora Amerîkayê di heman demê de endama Komîteya Hêzên Çekdar a Meclisa Senatoya Amerîkayê ye.
Li gorî daxuyaniya Serokatiya Herêma Kurdistanê, di civînê de pêwendiyên Îraq û Herêma Kurdistanê yên bi Amerîkayê re, çawaniya xurtkirina hevkariyê di warê ewlehî û parastinê de, pêşhatên şerê li dijî terorê û hewlên Hevpeymaniya Navneteweyî ya li Dijî DAIŞê (Koalîsyon) di warê rûbirûbûna gef û metirsiyên DAIŞê hatin gotûbêjkirin.
Li gorî daxuyaniyê, Nêçîrvan Barzanî ji ber piştgiriya Amerîkayê ya ji bo Îraq û Herêma Kurdistanê spasiya Amerîkayê kir.
“Hevahengiya ewlehiyê dê berdewam bike”
Rahênana hêzên Pêşmerge û xurtkirina şiyanên wan ên di çarçoveya Koalîsyonê de parastina ewlehî û aramiya herêmê ya li dijî terorê di civînê de hatine gotûbêjkirin.
Li aliyê din, Senator Elissa Slotkinê jî da zanîn ku dê piştgiriya Amerîkayê ya ji bo Herêma Kurdistanê berdewam bike.
Senatora Amerîkî ji bo misogerkirina aramiya Îraq û Herêma Kurdistanê amaje bi girîngiya hevahengiya ewlehiyê ya hevbeş kir.
Pêşhatên siyasî û ewlehiyê yên Îraq û Sûriyeyê û çend mijarên din ên girîng di civînê de hatin gotûbêjkirin.
Konferansa Ewlehiyê ya Munîhê
Konferansa Ewlehiyê ya Munîhê (MSC) îsal cara 61ê di navbera 14-16ê Sibatê de tê lidarxistin.
Di rojeva konferansê de “plana aştiyê ya Donald Trump a ji bo Ukraynayê” û “rewşa Rojhilata Navîn” dê cih bigirin.
Konferansa Ewlehiyê ya Munîhê (MSC) dê di warê ewlehî û siyaseta derve de bibe mezûvana nîqaşên girîng ên cîhanî.
MSC yek ji konferansên herî girîng ên ewlehiyê yên cîhanê ye û cara ewil sala 1963yan hatibû lidarxistin.
Her sal bi sedan rêberên girîng ên cîhanê beşdarî vê konferansê dibin û pirsgirêk û gef û metirsiyên ewlehiyê yên cîhanî dinirxînin.
Konferans di nêzîkirina perspektîvên cuda û zêdekirina baweriya di navbera welatan de roleke girîng dilîze.
Serokê Herêma Kurdistanê Nêçîrvan Barzanî li Munîhê bi Senatora Amerîkî Elissa Slotkinê re civiya
— RudawKurdi (@RudawKurdi) February 15, 2025
Serokatiya Herêma Kurdistanê ragihand, "Di civînê de pêwendiyên Îraq û Herêma Kurdistanê yên bi Amerîkayê re, çawaniya xurtkirina hevkariya di warê ewlehî û parastinê de, rûdanên… pic.twitter.com/B3rs2YWHin
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse