Hewlêr (Rûdaw) - DEM Partiyê piştî civîna xwe ya meclisê diyar kir ku perspektîva çareseriyê ya Rêberê PKKyê Abdullah Ocalan ji bo aştiyê derfeteke dîrokî ye.
DEM Partiyê da zanîn ku divê polîtîkayên tecrîdê yên li ser Ocalan bên bidawîkirin.
Meclisa DEM Partiyê doh li ser pêşhatên siyasî, danîna qeyûman, desteserkirina siyasetmedaran, lêpirsînan û peyama Abdullah Ocalan civiya.
Encamên civînê bi daxuyaniyekê hatin ragihandin û di daxuyaniyê de "mijarên sereke yên çareseriyeke demokratîk û aştiyê" wekî 4 xalan hatin diyarkirin û hat gotin ku perspektîva çareseriyê ya Ocalan ji bo vê yekê derfeteke dîrokî ye.
4 xalên ku DEM Partiyê destnîşan kirine ev in:
1- Divê tecrîda li ser Ocalan were rakirin û saziyên civakî karibin rasterast agahiyan li ser bipêşketinên pêvajoya aştî û demokratîkbûnê wergirin.
2- Divê mafên demokratîk û siyasî yên gelê Kurd di bin garantiya destûrê de bin û li Tirkiyeyê pêvajoyeke demokratîk a berfireh dest pê bike.
3- Divê hemû pêkhateyên civakî yên wekî Kurd, Tirk, Ereb, Ermenî, Suryanî, Roman û baweriyên wekî Sunî, Elewî, Êzidî, Xirîstiyan û Cihû xwedî mafên wekhev bin.
4- Divê Tirkiye li Rojhilata Navîn dev ji siyaseta şer berde û bi diyalog û aştî bi pêş bikeve û bi gelên herêmê re pêwendiyên yeksaniyê dayne.
Cemîl Bayik: Me ji Rêber Apo nameyek wergirt
DEM Partiyê 10ê vê mehê diyar kir ku dê heyeta Îmraliyê 16ê Sibatê were Başûrê Kurdistanê û dê li Hewlêrê bi Serok Mesûd Barzanî û Serokê Herêma Kurdistanê Nêçîrvan Barzanî re bicive.
Heyet dê 17ê Sibatê here Silêmaniyê û bi Serokê YNKyê Bafil Talebanî, Qubad Talebanî û rayedarên YNKyê jî re bicive.
Herî dawî doh Hevserokê Konseya Birêvebir a KCKyê Cemîl Bayik anî ziman ku wan ji Abdullah Ocalan nameyek wergirtiye û got, “Rêber Apo dixwaze pirsgirêka Kurd ji ser zemîna şer bikişîne ser zemîna demokratîk.”
Tê çaverêkirin heyeta Îmraliyê ya DEM Partiyê piştî vegera ji Herêma Kurdisanê dîsa here Îmraliyê û nêrînên berpirsên Herêma Kurdistanê bi Abdullah Ocalan re par ve bike.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse