Dr. Salih Zengene beşdarî bultena Rûdawê bû
Hewlêr (Rûdaw) – Pisporê jîngehê Dr. Salih Zengene diyar kir ku parzûngehên Herêma Kurdistanê bi awayekî zanistî nehatine çêkirin û rewşa keşûhewayê jî li ber çavan nehatiye girtin.
Doh êvarî li ser rêya Gwêr- Kerkûkê agir li embareke qîrê ya derket.
Dr. Salih Zengene beşdarî bultena Rûdawê bû û da zanîn ku şewata li parzûngehan, bandorê li ser hewayê dike û madeya karbonê û hîdrojenê durist dike.
Li gorî gotina Salih Zengene, bandora yekser a karbon û hîdrojenê li ser hemû endamên nefesê yên mirov heye.
“Ew gazên derdikevin metirseyeke mezin çêdikin”
Di berdewamiya axaftina xwe de Dr. Salih Zengene behsa gazên kîmyayî jî kir û got:
“Ew gazên derdikevin metirseyeke mezin çêdikin û dikarin biçin nava nefesa mirov û ji ser nefesa mirov jî biçin nava xwîna mirov.”
Zengene her wiha, amaje bi wê yekê jî kir ku dûmana bi jehrî li gorî bayê ber bi deverên din ve diherike û dibe ku zererê bide atmosfera cihên din.
Li aliyê din, Serbaz Kerîmê bazirganê neft û sotemeniyê ji Rûdawê re got, agir bi embareke qîrê ketiye ku ji bo rê û cadeyan tê bikaranîn.
Serbaz Kerîm da zanîn ku di parzûngehê de zêdetirî 17 hezar ton hatiye embarkirin û ev jî bûye sedema şewatê.
Serbaz Kerîm di berdewamiyê jî de got: “Ti pêdiviyên ewlehiyê ji bo pêşîlêgirtina agir û pêdiviyên vemirandina agir li van parzûngehan nînin.”
Zêdetirî 35 tîmên berevaniya sivîl a Hewlêrê ji bo kontrolkirina şewata li parzûngeha li ser rêya Hewlêr-Gwêrê kar kir û agir îro hat kontrolkirin.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse