Karker pembû diçinin/Wêne: Rêveberiya Xweser
Hewlêr (Rûdaw) - Li Rojavayê Kurdistanê û bakurrojhilatê Sûriyeyê Rêveberiya Xweser xwe ji bo wergirtina berhemê mûsima pembû amade dike.
Li Rojavayê Kurdistanê û bakurrojhilatê Sûriyeyê li ser rûberê 17 hezar hektarî pembû hatiye çandin.
“Em pêşbînî dikin îsal 75 heta 100 hezar ton pembû wergirin”
Hevserokê Saziya Giştî ya Pembû ya Rêveberiya Xweser Mistefa Îbrahîm got:
"Ji ber giringiya berhema pembû û li gorî biryara hejmara 216an a Encûmena Cîbicîkar a Rêveberiya Xweser, Saziya Giştî ya Pembû hat damezrandin, da ku berhema pembû ji cotkaran wergire.
Me niha navendên xwe yên li Dêrezor, Reqa û Hesekê amade kirine.
Herwiha me tîm û kadroyên xwe jî amade kirine bo wergirtina berhema pembû.
Em pêşbînî dikin îsal 75 heta 100 hezar ton pembû wergirin."
Ji aliyê xwe ve Desteya Çandinî û Avdaniyê ya Rêveberiya Xweser hemû pêdiviyên çandiniya pembû yên wekî tov, semad û mazotê li cotkaran belav kiriye.
Rûberê herî mezin ê çandiniya pembû jî li Reqayê hatiye tomarkirin.
“70 hezar donim pembû hatiye çandin”
Ji Ofîsa Çandiniyê ya Rêveberiya Xweser Mehmûd el-Mihbaş jî wiha anî ziman:
"Komeleyên ku li ba Komîteya Çandiniyê hatine tomarkirin 141 komeleyên cotkaran in.
842 hezar lître mazot li cotkaran hatiye belavkirin û 213 bîr bo avdaniyê kar dikin.
1ê Tîrmehê me dest bi belavkirina beşa duyem a mazotê kir.
Mazot bi rêya sektorên taybet û sîstema elektronîk li cotkaran tê belavkirin."
Çandina pembû li Rojavayê Kurdistanê
Li Rojavayê Kurdistan û bakurrojhilatê Sûriyeyê pembû dawiya Adarê û destpêka Nîsanê tê çandin.
Ji bo ku berhemeke baş bê bidestxistin divê 5 heta 8 caran çewlîkên pembû bên avdan û dawiya Îlonê jî dest bi berhevkirinê tê kirin.
Her donimek 350 heta 500 kîlo berhem dide.
Sala borî Rêveberiya Xweser bihayê kirîna yek ton pembû wekî 800 dolarî destnîşan kiribû lê ev yek bûbû sedema nerazîbûneke zêde.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse