Hewlêr (Rûdaw) - Wezareta Parastinê ya Tirkiyeyê ragihand ku di “Operasyona Pence-Kilîdê” de leşkerekî wan hat kuştin.
Wezareta Parastinê ya Tirkiyeyê li ser hesabê xwe yê Twitterê daxuyaniyek belav kir û tê de ragihand ku li devera “Operasyona Pence-Kilîdê” ku dikeve nav axa başûrê Kurdistanê, PKKyê li dijî leşkerên wan çalakiyek kiriye.
"5 leşkerên din hatibûne kuştin"
Li gorî daxuyaniya Wezareta Parastinê ya Tirkiyeyê Çawişê Pispor ê Piyade Mustafa Sezer bi guleya gerîlayên PKKyê hat kuştin.
Wezaretê pêştir jî diyar kiribû ku di êrişa gerîlayên PKKyê de 5 leşkerên wan hatine kuştin.
Wezareta Parastinê ya Tirkiyeyê herwiha di daxuyaniyeke din de jî amaje bi wê yekê kir ku di nava heftiyekê de 53 gerîlayên PKKyê û şervanên Hêzên Sûriya Demokratîk (HSD) li Rojava û Başûrê Kurdistanê di encama operasyonên wan de canê xwe ji dest daye.
“Şer û pevçûn berdewam dikin”
Li aliyê din medyaya nêzîkî PKKyê jî ragihand ku 9-10ê Tebaxê li Girê Cûdiyê yê nav axa Başûrê Kurdistanê 12 leşkerên artêşa Tirkiyeyê hatine kuştin.
Li gorî heman nûçeyê şerê di navbera artêşa Tirkiyeyê û gerîlayên PKKyê de berdewam dike.
“Operasyona Pence-Kilîdê” kengî dest pê kir?
Artêşa Tirkiyeyê roja 17ê Nîsana 2022an li deverên Zap, Avaşîn û Metînayê yên nav axa başûrê Kurdistanê bi hinceta gerîlayên PKKyê dest bi “Operasyona Pence-Kilîdê” kir û ew êriş heta niha jî berdewam dike.
“Operasyona Pence-Kilîdê” deverên Metîna, Zap û Avaşîn-Basyanê yên di nav axa Herêma Kurdistanê de li xwe digire.
Ji wê demê ve li wan deverên şerê di navbera gerîlayên PKKyê û artêşa Tirkiyeyê de berdewam dike.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse