Hewlêr (Rûdaw) – Rêveberê Bajarokê Batîfayê ji Rûdawê re ragihand, balafirên şer ên Tirkiyê nêzîkî gundê Banka Jor û Banka Jêr ên li sînorê vî bajarokê Zaxoyê bombebaran kirine û li gor zanyariyan otomobîleke PKKê li nêzîk gundê Banka Jor bûye armanc. Wezareta Berevaniya Tirkiyê jî dibêje, di êrîşekê de li bakurê Iraqê 11 gerîlayên PKKê hatine kuştin.
Hacî Husên, niştecihekî gundê Banka Jor ji Rûdawê re ragihand, derengiya şeva bihorî firokeyên Tirkiyê derdora gundê Banka jor bombebaran kirin û otomobîlek kirine armanc, lê zirarên êrîşê nehatine zanîn. Bi gotina wî akinciyê gund, ji ber bombebaranê elektrîka herdu gundên Banka Jor û Banka Jêr hatiye birîn û camên pencereyên hin malan şikestine.
Rêveberê Bajarokê Batîfayê, Dilşêr Ebdulsitar jî ji Rûdawê re ragihand, zanyarî gihîştine wan ku firokeyên Tirkiyê nêzîkî gundên Banka Jor û Banka Jêr bombebaran kirine û di encamê de elektrîka wan gundan qut bûye.
Dilşêr Ebdulsitar diyar kir, ti zirareke canî çê nebûye, lê zirar gihîştiye elektrîka wan gundan û malên çend hemwelatiyan. Rêveberê Bajarokê Batîfayê destnîşan kir, îro em dê tîmên xwe bişînin wan gundan daku bi diristî ziraran bizanin û kêşeya elektrîkê jî çareser bikin.
Wezareta Berevaniya Tirkiyê jî di twîtekê de ragihandiye, li Heftanîn û Zapê li “Bakurê Iraqê” piştî çavdêrîkirin û keşfa li herêmê di encama operasyoneke esmanî de 11 gerîlayên PKKê hatine kuştin.
Derbarê vê êrîşa esmanî û îdiaya kuştina gerîlayan de, PKKê hêj ti daxuyaniyek nedaye.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse