Joe Buccino û Nalîn Hesen / Wêne û Vîdeo: Rûdaw
Berdevkê berê yê CENTCOMê Joe Buccino diyar kir, Trump dê destûrê bide ku Tirkiye êrişî Rojavayê Kurdistanê bike.
Joe Buccino li ser fikra Trump a li ser vekişandina hêzên Amerîkayê got:
“Bi ya min Serok Trump difikire ku hemû hêzên Amerîkayê ji bakurê Îraq û Sûriyeyê vekişîne.
Siyaseta Trump li ser wê bingehê ye ku nabê hêzên Amerîkayê li beşên din ên cîhanê bimînin.”
Joe Buccino bi bîr anî ku Trump berê jî hêzên Amerîkayê vekişandin û anî zimên, “Bi ya min dê vê carê soza xwe bibe serî û hemû hêzên Amerîkayê ji Sûriyeyê derxe.”
Berdevkê berê yê CENTCOMê diyar kir, “Siyaseta Trump ew e ku hêzên Amerîkayê vegerin welat û ew difikire ku hêzan ji Îraq û Sûriyeyê vekişîne.”
Berdevkê berê yê Fermandariya Navendî ya Amarîkayê (CENTCOM) Joe Buccino bû mêhvanê Nûrojê û pirsên Nalîn Hesenê bersivandin:
Rûdaw: Tu pêşbînî dikî ku di siyaseta derve ya Amerîkayê de ti guherîn rû bide?
Joe Buccino: Bi ya min Serok Trump difikire ku hemû hêzên Amerîkayê ji bakurê Îraq û Sûriyeyê vekişîne. Wî sala 2019an jî hêz vekişandin. Wî wê demê jî got ku dê hemû hêzên xwe ji Sûriyeyê vekişîne.
Wê demê Mattes (James Norman Mattis) wezîrê parastinê bû û li dijî vê biryarê derketibû û Trump paşê biryara xwe guhert.
Rûdaw: Yanî Donald Trump dê hêzên Amerîkayê Sûriye û Rojavayê Kurdistanê vekişîne?
Joe Buccino: Belê, ez difikirim ku dê tiştekî wiha bike. Siyaseta Trump li ser wê bingehê ye ku nabê hêzên Amerîkayê li beşên din ên cîhanê bimînin.
Bi ya min dê vê carê soza xwe bibe serî û hemû hêzên Amerîkayê ji Sûriyeyê derxe.
“DAIŞ dikare careke din rabe ser xwe”
Rûdaw: Ev yek dê çi bandorê şerê bi DAIŞê re bike?
Joe Buccino: Dê bandora wê ya li ser Amerîkayê sînordar be lê dê bandora wê ya li herêmê mezin be çimkî DAIŞ dikare li herêmên Sûriyeyê careke din rabe ser xwe û hêdî hêdî mezintir bibe û dibe ku ber bi welatên din û herêmên din ve ve jî belav bibe. Ez di vê çarçoveyê de dilgiran im.
“Dê hemû hêzan vekişîne”
Rûdaw: Gelo Amerîka dê hêzên xwe qonax bi qonax ji Rojavayê Kurdistanê vekişîne? Ev dê di demeke nêzîk dibe yan dê çawa be?
Joe Buccino: Biya min dê Serok Trump hemû hêzên Amerîkayê yên li herêmê vekişîne. Ew li dijî vê yekê ye ku hêzên Amerîkayê li deverên din ên cîhanê bin û naxwaze ku hêzên Amerîkayê li derveyî Amerîkayê bixebitin.
“Dê destûrê bide Tirkiyeyê”
Rûdaw: Te behsa sala 2019an kir. Gelo Trump dê careke din rê bide ku Tirkiye careke din êrişî Rojavayê Kurdistanê bike?
Joe Buccino: Belê, ez wiha difikirim. Li gorî fikra min dê hevpeymanên me rastî pêvajoyeke wiha werin û bi rastî jî ev cihê dilgiranî ye.
“Trump dê li gorî berjewendiyên xwe tevbigere”
Rûdaw: Dê di nav îdareya bê ya Amerîkayê de ti dostên Kurdan nebin ku rê li ber vê bigirin?
Joe Buccino: Ez hêvî dikim, hêvî dikim ku wiha be lê biya min ew (Trump) dê li gorî berjewendiyên xwe tevbigere û dema kampanyaya hilbijartinan soz da ku hêzên Amerîkayê vegerîne welatê wan.
“Gelo çi berjewendiya Amerîkayê heye?”
Rûdaw: Berjewendiya Amerîkayê ji vekişîna hêzan çi ye gelo?
Joe Buccino: Em dipirsim: Gelo çi berjewendiya Amerîkayê di mayîna li herêmê de heye?
Trump berê gotiye ku di mayîna li wê derê de ti berjewandiya me nîne û divê yekîneyên Amerîkayê vegerin.
“Çima em çavkaniyan xerc bikin?”
Rûdaw: Gelo berjewendiyên aborî û parastina dost û hevbeşên xwe ne ji binemayên siyaseta derve ya Amerîkayê ne?
Joe Buccino: Dibe ku Serok Trump bibêje, “Çima em çavkanî û dema xwe ji bo wan tiştan xerc bikin ku berjewendiyekê nadin Amerîkaye?” û wan vegerîne Amerîkayê.
“Siyaseta Trump ew e ku hêzên Amerîkayê vegerin welat”
Rûdaw: Tenê Sûriye ye yan jî plana Trump heye ku hêzên xwe ji Îraqê jî vekişîne?
Joe Buccino: Nizanim, siyaseta Trump ew e ku hêzên Amerîkayê vegerin welat û ew difikire ku hêzan ji Îraq û Sûriyeyê vekişîne.
Kesê ku niha ji bo wezareta parastinê namzed e jî tiştên bi vî rengî gotine û bi zelalî gotiye ku divê hêz vekişin.
“Biryar êdî ya Trump e”
Rûdaw: Eger Amerîkayê hêzên xwe vekişandin ji bo parastina berjewendiyên Amerîkayê û rêlibergirtina belavbûna Îranê ti alternatîv hene.
Joe Buccino: Dibe ku hinek vebijêrk hebin lê ev biryar di destê îdareya Trump de ye, biryar êdî ya wî ye.
Berdevkê berê yê CENTCOMê Joe Buccino: Bi ya min Serok Trump difire ku hêzên Amerîkayê ji bakurê Sûriye û Îraqê vekişîne
— RudawKurdi (@RudawKurdi) November 13, 2024
🎤 Trump dê destûrê bide ku Tirkiye êrişî Rojavayê Kurdistanê bike
🎤 Siyaseta Trump li ser wê bingehê ye ku nabê hêzên Amerîkayê li wan deran bimînin
🎤… pic.twitter.com/M6iDiZ9ZmB
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse