مامۆستا ئاسیرم شواشی لە قوتابخانەکەی لە شاری زوارەی رۆژئاوای لیبیا زمانی دایکی بە ژمارەیەکی زۆری منداڵانی ئەمازیغی دەڵێتەوە
رووداو دیجیتاڵ
مامۆستا ئاسیرم شواشی لە قوتابخانەکەی لە شاری زوارەی رۆژئاوای لیبیا زمانی دایکی بە ژمارەیەکی زۆری منداڵانی ئەمازیغی دەڵێتەوە؛ ئەو دڵخۆشە و دەڵێت: زمانی ئەمازیغی تەنیا پیت و وشە نییە، بەڵکو گوزارشت لە کولتوور و ناسنامە و مێژووی گەلێکی گەورە دەکات. "ئەمازیغ و عەرەب دوو شتی جیاوازن."
گەلی ئەمازیغ بە یەکێک لە گەلە دێرینەکانی جیهان دادەنرێت و بە گوتەی مێژووناسان ئەوان گەلی رەسەنی ناوچەی باکووری ئەفریقان و مێژوویان بۆ زیاتر لە 5 هەزار ساڵ دەگەڕێتەوە. ئێستا ژمارەیان لە نێوان 30 تا 35 ملیۆن کەس مەزەندە دەکرێت کە نزیکەی 17 ملیۆنیان لە مەغریبن، 14 ملیۆن لە جەزائیر، 100 هەزار لە تونس و زیاتر لە 500 هەزاریان لە لیبیان. ئەوە سەرباری 2 ملیۆن ئەمازیغی لە ئەوروپا و ئەمریکا.
لە سەردەمی موعەمەر قەزافی هەموو شتێكی پەیوەندیدار بە ئەمازیغ قەدەخە بوو؛ بە هاتنی دەسەڵاتی نوێ، قەدەخەکان نەمان؛ بەڵام لە بەرامبەردا نەوەیەکی نوێی ئەمازیغی هاتووەتە ئاراوە زۆر ئاشنای زمان و کولتووری گەلەکەیان نیین.
لە شاری زوارە کە بە پایتەختی ئەمازیغەکانی لیبیا ناسراوە، هەڵمەتێكی فێرکردن و هۆشیارکردنەوەی نەوەی نوێیان دەستپێکردووە.
ئیسماعیل ئەبوودیب، میدیاکاری ئەمازیغی دەڵێت: "خەڵکی زوارە ئەمازیغین و بە زمانی ئەمازیغی قسە دەکەن، بۆیە ئەرکی سەر شانمانە رێز لە ناسنامە و مێژوومان بگرین و منداڵانمان فێر بکەین."
هەرچەندە ئێستا لە لیبیا و مەغریب دان بە زمانی ئەمازیغی دا نراوە و رێگەش دەدرێت لە قوتابخانەکان بخوێندرێت، بەڵام وەک ئەمازیغەکان دەڵێن، لەلایەن عەرەبە نەتەوەپەرستەکانەوە رووبەڕووی بەعەرەبکردن دەبنەوە و ئەو پرۆسەیەش ساڵ دوای ساڵ چڕتر و رێکخراوتر دەبێت.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ