بزووتنەوەی تاڵیبان: ئەو ڤیزایەی لە ئێران دەدرێت، کاری پێناکرێت

 

 

نووسراوەکە مۆری "ئیمارەتی ئیسلامیی ئەفغانستان"ی لەسەرە و تێیدا ئاماژە بەوە کراوە، ئەو هاووڵاتییانەی ئێران کە سەردانی ئەفغانستان دەکەن و پێویستیان بە ڤیزای ئەو وڵاتەیە، دەبێت لە 22-08-2021ـەوە ڤیزا لە دەروازەی سنووریی "ئیسلام قەلعە" وەربگرن و چیدیکە کار بەو ڤیزایانە ناکرێت کە لە شارە جیاوازەکانی ئێران دەدرێت.

 

ئیسلام قەلعە شارۆچکەیەکی سنوورییە لە ویلایەتی هیراتی رۆژئاوای ئەفغانستان و دەکەوێتە سەر سنووری ئێران و ئەفغانستان. 

 

ئەو دوو وڵاتە سنوورێکی 950 کیلۆمەتری لەنێوانیاندایە و سێ خاڵی سنووریش دەکەونە ئەو سنوورە، بەڵام ئیسلام قەلعە سەرەکیترینیانە.

 

ئێران بە گەورەترین هاوبەشی بازرگانیی ئەفغانستانیش دادەنرێت؛ بەگوێرەی ئامارە فەرمییەکان، قەبارەی بازرگانیی ئەو دوو وڵاتە لە ساڵانی 2017 و 2018دا دوو ملیار دۆلار بووە.

 

شەڕ و دۆخی خراپی ئابووریی ئەفغانستانیش وایکردووە، لە ماوەی چەند دەیەی رابردوودا خەڵکێکی زۆر لە ئەفغانستانەوە بچنە ئێران. بە گوێرەی میدیای ئێران، زیاد لە سێ ملیۆن هاووڵاتیی ئەفغانستان لەو وڵاتە دەژین.