هەڵبژاردنی بەرایی سەرۆکایەتیی ئەمریکا
رووداو دیجیتاڵ
دۆناڵد ترەمپ، بە بردنەوەی لە هەڵبژاردنی بەرایی لە ویلایەتی ئایۆوا دەستپێکێکی باشی بۆ خۆی تۆمارکرد و ئێستاش بەربژێرە کۆمارییەکان خۆیان بۆ هەڵبژاردنی نیو هامشایەر ئامادە دەکەن.
ئەمریکییەکان لە کەشوهەوایەکی سارددا و لە رێژەیەکی کەمی بەشداریی دەنگدەران، دەنگیان دا و ترەمپ رێژەی 51٪ـی دەنگەکانی لە هەڵبژاردنی بەرایی لە ئایۆوا بردەوە و 20 نوێنەری بۆ خۆی مسۆگەر کرد. هەر بەربژێرێک پێویستە 1215 نوینەر بباتەوە بۆ ئەوەی ببێتە بەربژێری فەرمیی کۆمارییەکان.
لەدوای ئایۆوا، ترەمپ روو لە ویلایەتی نیو هامشایەر دەکات، لەوێش بەربژێرە کۆمارییەکان کێبڕکێ لەسەر 22 نوێنەر دەکەن.
دۆناڵد ترەمپ، بەربژێری کۆمارییەکان بۆ سەرۆکی ئەمریکا دەڵێ "ئێستا کاتی ئەوەیە پارتی کۆماری یەکبگرێت، پێکەوە وەکو یەک تیم بەرەوپێش بچین و لە جۆ بایدنی لار و لەت ببەینەوە. دەبێت لێی ببەینەوە."
بەربژێرە کۆمارییەکانی دیکە، کەمتر لە یەک هەفتەیان لەبەردەمە، بۆ ئەوەی شکستەکەی ئایۆوا لە نیو هامشایەر راستبکەنەوە. جیا لە ڤیڤیک راماسوامی کە خۆی بەدەستەوە دا و پاڵپشتیی بۆ ترەمپ دەربڕی، بەربژێرەکانی دیکە لە بانگەشەیەکی توونددان لەدژی ترەمپ.
نیکی هەیلی، بەربژێری کۆمارییەکان بۆ سەرۆکی ئەمریکا دەڵێ "سەیربکەن، ئەگەر چوار ساڵی دیکەت دەوێت لە پشێوی، ئەوە بەدەستی دەهێنیت، بەڵام ئەوەی زۆر جێگەی نیگەرانییە ئەوەیە؛ سەیری راپرسیی نێوان ترەمپ و بایدن دەکەی، زۆر یەکسانن، واتە هەڵبژاردنێکی پڕ لە دڵەڕاوکێمان دەبێت. سەیری هەمان راپرسی دەکەی، بە 17 خاڵ لە بایدنم بردووەتەوە."
بەگوێرەی دوایین راپرسی، 68٪ـی کۆمارییەکان دەڵێن ترەمپ چانسی باشی هەیە هەڵبژاردنی نۆڤەمبەر بباتەوە، ئەمەش هاوکاتە لەگەڵ دابەزینی ئاستی رەزامەندیی خەڵکی ئەمریکا لە جۆ بایدن بۆ 33٪؛ کاتێک ترەمپ لە کۆشكی سپی بوو، لە خراپترین ئاستیدا ئاستی رەزامەندیی خەڵك لێی 36٪ بوو.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ