تورکیا 5 فەرماندەی سەربازیی ئۆکراینی دەداتەوە زیلنسکی و رووسیا تووڕە دەکات

 

راگەیاندنی گەڕانەوەی پێنج فەرماندەی سەربازیی یەکەی ئازۆڤ لە تورکیاوە بۆ ئۆکراینا، هەواڵێکی لەناکاو بوو، کە پێشێلی رێککەوتنێکی نێوان رووسیا، ئۆکراینا و تورکیاشە.

 

زیلنسکی لە لاپەڕەی تایبەتی خۆیەوە لە تویتەر گوتی، فەرماندەکانیان بۆ نیشتمانی خۆیان گەڕاندووەتەوە و بە پاڵەوان ناوی بردن.

 

ڤۆلۆدێمیر زیلنسکی، سەرۆکی ئۆکراینا گوتی "لە کۆتاییدا چاومان بە پاڵەوانەکانمان کەوتەوە، پارێزەرانی ماریۆپۆل و ئازۆڤستال؛ گەڕاندنماننەوە نیشتمان. هەموو پاڵەوانانی ئەم جەنگە، بەرز دەنرخێنم کە توانیویانە بەرگری تەواو بکەن".

 

یەکەی ئازۆڤ ئەو سەربازانەی ئۆکراینا بوون بۆ ماوەی 3 مانگ لەنێو کارگەی ئازۆڤستالی شاری ماریۆپۆل مانەوە و شەڕی سەربازانی رووسیایان کرد، تاوەکو لە نێوەڕاستی مانگی ئایاری 2022 خۆیان بەدەست سوپای رووسیا دا کە ژمارەیان 1733 کەس بوو.

 

دواتر لە ئەیلوولدا لە ئاڵوگۆڕێکی زیندانیاندا 215 سەربازی ئۆکراینی بە نێوەندگیریی تورکیا و ئۆکراینا بەرامبەر 55 سەربازی رووسی، رادەستی ئۆکراینا کرانەوە؛ بەو مەرجەی، 5 فەرماندەی هێزەکە ببرێنە تورکیا و تاوەکو کۆتاییهاتنی جەنگ، رێگەیان نەدرێت بچنەوە ئۆکراینا.

 

رووسیا راستەوخۆ کاردانەوەی نیشاندا و ئۆکراینا و تورکیا بە پێشێلکاری رێککەوتن و چاوبەستنی رووسیا ناودەبات.

 

دیمتری پیسکۆڤ، گوتەبێژی کرێملن رایگەیاند "گەڕانەوەی فەرماندەکانی ئازۆڤ لە تورکیا بۆ ئۆکراینا هیچ شتێک نییە جگە لە پێشێلکارییەکی راستەوخۆی مەرجەکانی رێککەوتنەکە. لایەنی تورکی و لایەنی ئۆکرایینیش بەشدارن لەم پێشێلکارییەدا".

 

ئۆکراینا و تورکیا تاوەکو ئێستا وەڵامی رووسیایان نەداوەتەوە؛ بەڵام کریملن ئەم هەنگاوەی تورکیا لە دۆستایەتییەکەی لەگەڵ رووسیا، بۆ مەیلی زیاتری ئەنقەرە بە لای رۆژئاوا و گوشاری ناتۆ لەسەری دەگەڕێنێتەوە.