رووداو دیجیتال
ئەمشەو کاژێر 23:00 بە کاتی باشووری کوردستان، یەکەم یاری پێشکۆتایی جامی سوپەری ئیسپانیا، لەسەر یاریگەی نوێڤۆ ئارکانخێل لە شاری کۆردۆبا لە نێوان بارسێلۆنا و ریال سۆسیداد بەڕێوەدەچێت.
ئەمە دووەم وەشانی جامی سوپەری نوێی ئیسپانیایە، کە بە بەشداری 4 یانە بەڕێوەبچێت، کە بریتین لە بارسێلۆنا، ریال مەدرید، ریال سۆسیداد و ئاتلێتیک بیلباو.
بارسێلۆنا پێشتر لە جامی سوپەری ئیسپانیادا هەرگیز رووبەڕووی ریال سۆسیداد نەبووەتەوە، بەڵام لە یارییەکانی لالیگا و جامی شای ئیسپانیادا زۆر یارییان کردووە.
بارسا له خولە ناوخۆکاندا 160 جار بەرامبەر ریال سۆسیداد یاریکردووە، 149 یاری لە لالیگا و 11 یاریش له جامی شادا، کە لە کۆی ئەو یارییانەدا بارسێلۆنا 90 جار براوەبووە و 33 جاریش دۆڕاوە، 37 یاریش بە یەکسانبوونی هەردوولا کۆتاییهاتوون.
بارسا لەوەتەی وەرزی 2015 - 2016 بە سۆسیداد نەدۆڕاوە، نە لە لیگا و نە لە جامی شادا.
سبەی لە دووەم یاری پێشکۆتاییدا یانەی ریال مەدرید رووبەڕووی یانەی ئاتلێتیک بیلباو دەبێتەوە و رۆژی 17ـی ئەم مانگەش یاریی کۆتایی جامی سوپەری ئیسپانیا ئەنجام دەدرێت.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ