رووداو دیجیتاڵ
دوای تووشبوونی لویس ڤان خال، راهێنەری هۆڵەندا بە شێرپەنجە بەشێکی زۆری وەرزشوانان لەسەر ئاستی جیهان پاڵپشتی ئەو راهێنەرە دەکەن.
راهێنەرە هۆڵەندییە 70 ساڵەکە، مێژووییەکی دوور و درێژی لە ئەزموونی راهێنەرایەتیدا هەیە، بۆیە تووشبوونی ئەو بە شێرپەنجەی پرۆستات کاردانەوەی زۆری دروستکرد، بەڵام ئەو سوورە لەسەر کارکردن لەگەڵ هەڵبژاردەی هۆڵەندا و بەشداریکردن لە مۆندیالی 2022.
فیدراسیۆنی تۆپی پێی هۆڵەندا وێنەیەکی ڤان خال و دڵێکی پرتەقاڵیی وەک پاڵپشتییەک بۆ راهێنەرەکە دانا.
فیدراسیۆنی تۆپی پێی ئەوروپا پاڵپشتی راهێنەرەکە دەکات و دەڵێت " لە جیاتی تۆپی پێی ئەوروپا، هیوای تەندروستییەکی باش بۆ ڤان خال دەخوازین، هەموومان لەگەڵتین لویس."
هەڵبژاردەی ئەڵمانیا پاڵپشتی ئەو راهێنەرە دەکات و هیوای تەندروستییەکی باشی بۆ دەخوازێت.
لەسەر ئاستی یانەکان یانەی بایرن میونشنی ئەڵمانی کە پێشتر ڤان خال راهێنەری بووە نووسیوویەتی، هەموومان دەزانین هێزی تۆ چەندە، هیوای تەندروستییەکی باش و خێرات بۆ دەخوازین."
لەلایەن خۆیەوە یانەی ریال مەدریدی ئیسپانی پاڵپشتی لە راهێنەرەکە دەکات و دەڵێت " یانەکەمان هەموو هەست و سۆزەکانی بۆ راهێنەری هەڵبژاردەی هۆڵەندا دەنێرێت، ئەو هێزەی هەمیشە پێشانیدەدات یارمەتیدەدات بۆ ئەوەی بەسەر ئەم نەهامەتییەدا سەربکەوێت."
چاڤی هێرناندێز راهێنەری بارسێلۆنا وێنەیەکی خۆی و ڤان خالی بڵاوکردووەتەوە و نووسیوویەتی " هێزێکی زۆر بەرێز، سوپاس بۆ هەموو شتێک و باوەشێکی گەرم بۆ تۆ."
مارکۆس راشفۆرد نووسیوویەتی " یەکەم دەرکەوتنی من لەگەڵ ڤان خال بووە، ئەوە هەمیشە لە یادەوەری مندا دەمێنێت، تۆ دەتوانیت شەڕی ئەمە بکەیت و هەموومان لە پشتی تۆین."
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ