مەهدی ئەکەر، سەرۆکی ناوەندی ستراتیژیی پێشخستنی سیاسەتی کشتوکاڵە و پێشتریش وەزیری کشتوکاڵی تورکیا بووە.
رووداو دیجیتاڵ
مەهدی ئەکەر، سەرۆکی ناوەندی ستراتیژیی پێشخستنی سیاسەتی کشتوکاڵە و پێشتریش وەزیری کشتوکاڵی تورکیا بووە، لە هەڤپەیڤینێکی تایبەتیدا لەگەڵ تۆڕی میدیایی رووداو، وەڵامی چەند پرسیارێکی دڵدار هەرکی دەداتەوە و لەبارەی پەیوەندییەکانی هەرێمی کوردستان و تورکیا دەڵێت، "لەسەر رێیەکی زۆر باشدایە".
ئەکەر، سیاسەتڤانێکی کوردە و ئەندامی پارتی داد و گەشەپێدانی تورکیا و ماوەیەکیش پەرلەمانتار بووە لە فراکسیۆنی ئەو حیزبە، ئێستا لە هەرێمی کوردستان ناوەندێکی بە ناوی ستراتیژیی پێشخستنی سیاسەتی کشتوکاڵ کردووەتەوە و خۆی سەرۆکی ناوەندەکەیە.
"هاتنم بۆ هەرێمی کوردستان بە بانگهێشتی مەسرور بارزانی بوو"
مەهدی ئەکەر، باسی هۆی هاتنی بۆ هەرێمی کوردستان دەکات و دەڵێت، "لەسەر بانگهێشتی بەڕێز مەسرور بارزانی بوو، لەبەرئەوەی لە زانکۆی ئەمریکی لە دهۆک پانێڵێک هەبوو کە پسپۆڕ و دیپلۆماتکار و سیاسەتڤان لە زۆر وڵاتەوە هاتبوون، لەبەرئەوە کاک مەسرور بانگهێشتی کردم و منیش بە قبووڵکردنی بانگهێشتەکە هاتم".
"پەیوەندیی هەرێمی کوردستان و تورکیا لەسەر رێیەکی زۆر باشدایە"
دڵدار هەرکی، لەبارەی پەیوەندییەکانی هەرێمی کوردستان و تورکیا، پرسیار لە مەهدی ئەکەر دەکات و لە وەڵامدا دەڵێت، "لە رێیەکی زۆر باشدایە، زۆر بەرەوپێش دەچێت، ئێمە لێی رازین، وەکو کاک مەسعود، کاک نێچیرڤان و کاک مەسروریش زۆر رازین، هەروەها هاکان فیدان، وەزیری دەرەوەمان لە کۆبوونەوەی لەگەڵ بەرپرسانی حکومەتی تورکیا داوایکرد پەیوەندییەکان باشتر ببن".
ئەو وەزیرەی پێشووی حکومەتی تورکیا زیاتر دەڵێت، "ئێمە دراوسێ و خوشک و برای یەکدین، پێموایە ئەگەر مرۆڤ دراوسێکەی ئارامی تێدا نەبوو، ئەویش ناتوانێت ئارام بێت".
لەبارەی هۆی ئارامیی لە هەردوولاشەوە دەڵێت، "لە سەرووی هەمووانەوە ئەوەیە کە ئێمە برای یەکدین، دراوسێی یەکدین و کولتوورمان زۆر لێک نزیکە و ئێمە لە هەرێمێکداین و لە مێژوودا ئێمە پێکەوە بووین، راستە لە سەت ساڵی رابردوودا کە جەنگە جیهانییەکان روویاندا و حکومەتی نوێ دروستکران، پەیوەندییەکانمان ئاڵۆزی تێکەوت، بەڵام ئەوە 22 ساڵە کە حکومەتەکەمان و سەرۆکەکەمان رەجەب تەیب ئەردۆغان، سیاسەتی هەندێک لە سیاسەتمەدارەکانی پێشتر جیاوازە، لەو ماوەیەدا پەیوەندییەکانمان لەگەڵ عێراق، هەرێمی کوردستان و دەوروبەری خۆمان باشتر و چاکترە".
"کەس نازانێت پەکەکە کار بۆ کێ دەکات"
مەهدی ئەکەر، پەکەکە و حیزب و هێزە نزیکەکانی وەکو گرفتێک لە ناوچەکە دەبینێت و دەڵێت، "ئێمە ئاشتیمان لە ناوچەکە دەوێت، چ لە نێوخۆی تورکیا بێت یان دەوروبەر، سەقامگیریمان دەوێت، لە رۆژەڤی سووریادا پەکەکە و باڵەکانی هەن، ناوی جیاواز لەوێ هەن، بەڵام یەکن و بە گشتی پەکەکەن، ئەوان بۆ کورد کارناکەن، بەڵکۆ بۆ کەسانی دیکەی دەکەن".
دڵدار هەرکی دەپرسێت، کێن ئەو کەسانە؟ لە وەڵامدا مەهدی ئەکەر دەڵێت، "کەس نازانێت چین، ئەو کەسانەی کە لەوێ نین دەستیان تێدایە، ئەو کەسانە دوورن، کەسانێک کە بە درێژایی 100 ساڵ بوونەتە کێشە".
"پەکەکە پێڤاژۆی ئاشتی هەڵوەشاند"
ئەو وەزیرەی پێشووی حکومەتی تورکیا باسی پێڤاژۆی ئاشتی لە باکووری کوردستان دەکات و پارتی کرێکارانی کوردستان بە هەڵوەشاندنەوەی پێڤاژۆکە تۆمەتبار دەکات "ئەو پێڤاژۆیە بۆچی هەڵوەشایەوە و کێ هەڵیوەشاندەوە؟ ئەوە بە دەستی پەکەکە هەڵوەشایەوە، پەکەکە نوێنەری کورد نییە و بۆ کوردیش ئەو کارەی نەکرد".
رووداو دەپرسێت، بۆچی پێڤاژۆیەکی نوێ کارا ناکەن؟ ئەکەر لە وەڵامدا دەڵێت، "پێڤاژۆ خۆی هەیە، سەرەتا پێویستە ئێمە لە پەکەکە رزگارمان ببێت، تاوەکو پەکەکە هەبێت ئەو ژەهرە دەڕێژێت و ناهێڵێت سەربگرێت، تاوەکو پەکەکە هەبێت، هیچ هەنگاوێک نانرێت، ئێمە ئەزموونمان کرد و بینیمان کە پەکەکە ژەهر دەڕێژێت".
"دەبێ هەدەپ بڵێ هیچ پەیوەندییەکم بە پەکەکەوە نییە"
مەهدی ئەکەر، پارتی کرێکارانی کوردستان بە تیرۆریست ناوزەد دەکات و دەڵێت، "دەبێ هەدەپ بە ئاشکرا بڵێت من پارتێکی مەدەنیم و هیچ پەیوەندییەکم بە پەکەکەوە نییە، من دژی تیرۆر و تووندوتیژیم، ئەوکات دەبێتە پارتێکی سیاسیی رەوا وەکو پارتەکانی دیکە".
"ئیسرائیل خاکی فەلەستین داگیر دەکات"
وەزیرەکەی پێشووی حکومەتی ئاکپارتی، شەڕی نێوان ئیسرائیل و حەماس، بە زۆرداری و داگیرکاری ئیسرائیل بۆ سەر فەلەستین وەسف دەکات و دەڵێت، "لە سەرەتای شەڕەکەوە تورکیا داوای جێبەجێکردنی مەرجە مرۆییەکان و کۆتاییهێنانی ستەمی داگیرکاریی ئیسرائیلی کردووە، کە خەڵکی بێتاوان دەکوژن کە زۆربەیان ژن و منداڵن، 13 بۆ 14 هەزار کەسیان کوشتووە".
دەشڵێت، "تورکیا هاوکاری خەڵکی غەززە دەکات و بۆ ئەو مەبەستەش پەیوەندیی بەردەوامی لەگەڵ میسر هەیە".
بە بڕوای ئەو، ئەگەری تەشەنەکردنی شەڕی غەززە بەهێزە "تورکیا بانگەوازێکی نێودەوڵەتی دەکات و دەڵێت، وەرن ئەو زۆردارییە رابگرن، ئەگەر ئەوە نەکەن، ئەو ستەمە تا سەر نابێت و سبەی شەڕەکە تەشەنە دەکات، دەربازی سووریا، میسر، لوبنان، ئوردن و عێراق دەبێت، ئەگەر ئاگر بگاتە ئەوێش، بێگومان پرشی ئاگرەکەش بەر دراوسێکان دەکەوێت و دەپەڕێتەوە بۆ دەوروبەر".
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ